AP News: మోపిదేవిలో వైభవంగా సుబ్రహ్మణ్య స్వామి కల్యాణోత్సవం

మోపిదేవి: సుబ్రహ్మణ్య షష్ఠి సందర్భంగా కృష్ణా జిల్లా మోపిదేవిలో స్వామివారి కల్యాణ మహోత్సవాన్ని అత్యంత వైభవంగా నిర్వహించారు. కల్యాణోత్సవం సందర్భంగా ఉదయం నుంచి శ్రీవల్లీ సమేత సుబ్రహ్మణ్యేశ్వర స్వామిని పెద్ద సంఖ్యలో భక్తులు దర్శించుకున్నారు. అనంతరం భక్తుల జయజయధ్వానాల మధ్య స్వామివారి కల్యాణం కన్నుల పండువగా జరిగింది. అర్చకులు వేదమంత్రోచ్ఛరణల మధ్య ఈ కార్యక్రమాన్ని జరిపించారు. అంతకుముందు నందివాహనంపై స్వామివారి గ్రామోత్సవం నిర్వహించారు. ఆలయ సహాయ కమిషనర్‌ లీలా కుమార్‌ స్వామివారికి పట్టువస్త్రాలు సమర్పించారు. 

సుబ్రహ్మణ్యేశ్వర సుప్రభాతం సీడీ ఆవిష్కరణ

సుబ్రహ్మణ్య షష్ఠి సందర్భంగా డాక్టర్‌ తాలపర్తి శ్యామలానంద ప్రసాద్‌ రచించి ఆలపించిన స్వామివారి సుప్రభాత సీడీని ఆవిష్కరించారు. ఈ సందర్భంగా స్వామివారి విశిష్టతను శ్యామలానంద ప్రసాద్‌ భక్తులకు వివరించారు. 

దర్శించుకున్న మంత్రి వేణుగోపాలకృష్ణ

కల్యాణోత్సవం సందర్భంగా రాష్ట్ర బీసీ సంక్షేమ శాఖ మంత్రి చెల్లుబోయిన వేణుగోపాలకృష్ణ సుబ్రహ్మణ్యేశ్వర స్వామి వారిని దర్శించుకుని ప్రత్యేక పూజలు నిర్వహించారు. నాగదేవతకు పూజలు నిర్వహించిన అభిషేకాలు చేశారు. మంత్రికి ఆలయ అధికారులు పూర్ణకుంభంతో స్వాగతం పలికారు. ప్రత్యేక పూజల అనంతరం అర్చకులు ఆయనకు వేదాశీర్వచనం చేశారు. అనంతరం ఆలయ సహాయ కమిషనర్‌ లీలాకుమార్‌ స్వామివారి చిత్రపటం, ప్రసాదాలను అందజేశారు.