Sai Dharam Tej: సాయి తేజ్ ఆరోగ్యంపై అసత్య ప్రచారాలు చేయొద్దు : తలసాని

హైదరాబాద్‌ : ఆ వినాయకుడి దయ వల్ల సినీ నటుడు సాయి ధరమ్‌ తేజ్‌.. రోడ్డు ప్రమాదం నుంచి స్వల్ప గాయాలతో బయటపడ్డారని మంత్రి తలసాని శ్రీనివాస్‌ యాదవ్‌ అన్నారు. అపోలో ఆస్పత్రిలో సాయి తేజ్‌ను పరామర్శించిన అనంతరం తలసాని మీడియాతో మాట్లాడారు. సాయి తేజ్‌కి చిన్న చిన్న గాయాలు మాత్రమే అయ్యాయని చెప్పారు. హెల్మెట్‌, షూస్‌, జాకెట్‌ ధరించడవం వల్ల ప్రమాదం తప్పిందని వివరించారు. సాయి తేజ్‌కు స్వల్ప ఫ్రాక్చర్‌ అయినట్లు ఎంఆర్‌ఐ స్కాన్‌లో తేలిందని వెల్లడించారు.

ఈ ఘటనపై మీడియా సంయమనం పాటించాలని మంత్రి కోరారు. కుటుంబసభ్యులు, అభిమానులెవరూ ఆందోళన చెందకుండా సమాచారం ఇవ్వాలని సూచించారు. సాయి తేజ్ ఆరోగ్యంపై అసత్య ప్రచారాలు చేయవద్దన్నారు. వైద్యులు ఎప్పటికప్పుడు పరీక్షలు నిర్వహిస్తున్నారని తెలిపారు.