Ts News: ఫిక్స్‌డ్‌ డిపాజిట్ల గోల్‌మాల్‌.. తెలుగు అకాడమీ డైరెక్టర్‌పై సస్పెన్షన్‌ వేటు

హైదరాబాద్‌: తెలుగు అకాడమీలో ఫిక్స్‌డ్‌ డిపాజిట్ల గోల్‌మాల్‌ వ్యవహారంలో రాష్ట్ర ప్రభుత్వం కీలక నిర్ణయం తీసుకుంది. అకాడమీ డైరెక్టర్‌ సోమిరెడ్డిపై సస్పెన్షన్‌ వేటు వేసింది. అకాడమీ డైరెక్టర్‌ ఇంఛార్జ్‌ బాధ్యతల నుంచి సోమిరెడ్డిని తప్పిస్తూ విద్యా శాఖ ఆదేశాలు జారీ చేసింది. పాఠశాల విద్యాశాఖ డైరెక్టర్‌ దేవసేనకు అకాడమీ డైరెక్టర్‌గా విద్యాశాఖ అదనపు బాధ్యతలు అప్పగించింది.

మరోవైపు ఈ కేసు వ్యవహారంలో సీసీఎస్‌ పోలీసులు ఇప్పటివరకు నలుగురిని అరెస్ట్‌ చేశారు. సంతోష్‌నగర్‌ యూనియన్‌ బ్యాంక్‌ మేనేజర్‌ మస్తాన్‌వలీ, సిద్ది అంబర్‌బజార్‌ అగ్రసేన్‌ బ్యాంక్‌ మేనేజర్‌ పద్మావతి, ఏపీ మర్కంటైల్‌ సహకార సంఘం ఛైర్మన్‌ సత్యనారాయణ, సొసైటీ ఉద్యోగి మోయినుద్దీన్‌ను పోలీసులు అరెస్ట్‌ చేశారు. మరోవైపు ఈ వ్యవహారంలో తెలుగు అకాడమీ అధికారుల పాత్రపై పోలీసుల విచారణ కొనసాగుతోంది. నగదు బదిలీ చేసిన ఉద్యోగులతో పాటు పలువురు బ్యాంక్ ఉద్యోగులను కూడా పోలీసులు ప్రశ్నిస్తున్నారు. ఈ నలుగురు నిందితులను కోర్టులో హాజరుపరిచిన అనంతరం చంచల్‌గూడ జైలుకు తరలించారు.