hyderabad news: పబ్‌లో చిన్నారి డ్యాన్స్‌ .. నోటీసులు జారీ చేసిన పోలీసులు

హైదరాబాద్‌: జంట నగరాల్లో పబ్‌ నిర్వాహకులు నిబంధనలు బేఖాతరు చేస్తున్నారు. 18ఏళ్ల లోపు వారిని పబ్‌లోకి అనుమతించకూడదనే నిబంధనలను పూర్తిగా ఉల్లంఘిస్తున్నారు. తాజాగా గచ్చిబౌలిలోని లాల్‌స్ట్రీట్‌ పబ్‌లోకి చిన్నారిని అనుమతించడంపై కలకలం రేగుతోంది. తన కుటుంబసభ్యులతో కలిసి చిన్నారి పబ్‌లోకి వచ్చింది. డీజే సౌండ్‌కు అనుగుణంగా డ్యాన్స్‌ చేసి సందడి చేసింది. ఈ దృశ్యాలను కొందరు నెటిజన్లు సామాజిక మాధ్యమాల్లో పోస్టుచేశారు. పోలీసు ఉన్నతాధికారులు ఈ ఘటనపై ఆగ్రహం వ్యక్తం చేస్తున్నారు. పబ్‌లోని సీసీ కెమెరా దృశ్యాలను పరిశీలిస్తున్నారు. చిన్నారిని పబ్‌లోకి ఎవరు తీసుకొచ్చారనే దానిపై ఆరా తీస్తున్నారు. పబ్‌ యాజమాన్యానికి నోటీసులు జారీ చేశారు. నిబంధనలు పట్టించుకోకుండా వ్యవహరిస్తే కఠిన చర్యలు తప్పవని పోలీసులు హెచ్చరిస్తున్నారు.