Ap News: తిరుమల ఘాట్‌రోడ్లపై రాకపోకలకు అనుమతిచ్చిన తితిదే

తిరుమల: గత రెండు రోజులుగా మూసివేసి ఉన్న తిరుమల ఘాట్‌ రోడ్లను తిరుమల తిరుపతి దేవస్థానం (తితిదే) పునరుద్ధరించింది. రెండు ఘాట్‌ రోడ్లలోనూ భక్తులను అనుమతించాలని నిర్ణయించింది. గత రెండు రోజులుగా తిరుమలతో కురిసిన భారీ వర్షాలకు ఘాట్‌రోడ్లపై చెట్లు కూలిపోయాయి. కొండచరియలు విరిగిపడ్డాయి. దీంతో వాటిని తొలగించేందుకు ఘాట్‌ రోడ్లను తితిదే మూసేసింది. ఘాట్‌ రోడ్లపై విరిగిపడిన చెట్లు, కొండచరియలను తొలగించిన అనంతరం రాకపోకలకు అనుమతించింది. దీనిలో భాగంగా మొదటగా ఇవాళ ఉదయం నుంచి ఘాట్‌ రోడ్‌-1 నుంచి వాహనాల రాకపోకలను పునరుద్ధరించారు. ఘాట్‌ రోడ్‌-2పై విరిగిపడిన కొండచరియలను తొలగించిన అనంతరం వాహనాలను అనుమతించారు.