TS News: అధ్వాన రోడ్లు.. పొర్లుతూ యువకుడి వినూత్న నిరసన

తాండూరు పట్టణం: వికారాబాద్‌ జిల్లా తాండూరు ప్రాంతంలో అధ్వాన రోడ్ల పరిస్థితిపై ఓ యువకుడు వినూత్నంగా నిరసన తెలిపాడు. దుమ్ము, ధూళి సమస్యలతో ఇబ్బందులు పడుతున్నామంటూ రోడ్డుపై పొర్లుకుంటూ నిరసన వ్యక్తం చేశాడు. అంతారం గ్రామానికి చెందిన అమ్రేష్‌ ఉదయం గ్రామ సమీపంలోని ఎన్టీఆర్‌ నగర్‌ కాలనీ నుంచి పాడైన రోడ్డుపై మోకాళ్లపై కొద్దిదూరం నడుచుకుంటూ.. ఆ తర్వాత రోడ్డుపై పడుకుని పొర్లుకుంటూ నిరసన వ్యక్తం చేశాడు. ఇది చూసిన స్థానికులు యువకుడికి మద్దతు తెలిపారు. ఇప్పటికైనా అధికారులు, పాలకులు రోడ్ల సమస్యను పరిష్కరించాలని డిమాండ్‌ చేశారు. విషయం తెలుసుకున్న స్థానిక పోలీసులు అక్కడికి చేరుకొని నిరసన తెలుపుతున్న యువకుడిని అదుపులోకి తీసుకుని స్టేషన్‌కు తరలించారు.