AP News: వహ్వా.. విశాఖ మన్యంలో కనువిందు చేస్తున్న మేఘాల కొండలు..

పాడేరు పట్టణం: విశాఖ మన్యంలో చలి తీవ్రత రోజురోజుకీ పెరుగుతోంది. వారం రోజులుగా శీతల గాలులు వీస్తుండటంతో గిరిజనులు ఉదయం వేళల్లో ఇళ్ల నుంచి బయటకు రావడం లేదు. పొగమంచు దట్టంగా కురుస్తుండటంతో వాహనదారులు ఇబ్బందులు పడుతున్నారు. గత మూడు రోజులుగా పాడేరు, చింతపల్లి మండలాల్లో తక్కువ ఉష్ణోగ్రతలు నమోదవుతున్నాయి. 

చింతపల్లి పరిధిలోని లంబసింగిలో 5.2, 6.7, 7.2 డిగ్రీలు.. పాడేరు పరిధిలోని మినుములూరు కాఫీ బోర్డులో 7.13, 8.22, 8.26 డిగ్రీల ఉష్ణోగ్రత నమోదైంది. మధ్యాహ్నం రెండు, మూడు గంటల నుంచి చలి గాలులు వీస్తున్నాయి. శీతాకాలంలో మన్యం అందాలను ఆస్వాదించేందుకు వస్తున్న పర్యాటకులు చలి మంటలు వేసుకుని ఉపశమనం పొందుతున్నారు.

కనువిందు చేస్తున్న వంజంగి మేఘాల కొండ..

పాడేరు మండలం వంజంగి వద్ద మేఘాల కొండ పర్యాటకులను కనువిందు చేస్తోంది. కొండ పైనుంచి కనిపిస్తున్న మేఘాలను చూసి సందర్శకులు మధురానుభూతికి లోనవుతున్నారు. సెల్ఫీలు దిగడంతో పాటు అక్కడి మనోహర దృశ్యాలను తమ కెమెరాల్లో బంధిస్తున్నారు.