chinna Jeeyar swamy: ప్రవేశానికి టికెట్‌ పెట్టాం.. సమతామూర్తి దర్శనానికి కాదు: చినజీయర్‌ స్వామి

విజయవాడ: కేవలం సమతామూర్తిని దర్శించుకోవడానికి టికెట్‌ పెట్టలేదని ఆధ్యాత్మిక వేత్త త్రిదండి చినజీయర్‌ స్వామి స్పష్టం చేశారు. అదో పెద్ద ప్రాంగణమని.. దాంట్లో ఎన్నో రకాలైన కార్యక్రమాలు జరుగుతాయని తెలిపారు. నిర్వాహణకు ఎంతో కొంత రుసుం పెట్టకపోతే వచ్చే సందర్శకులను నియంత్రించడం కష్టమవుతుందని పేర్కొన్నారు. మామూలుగా ఇలాంటి ప్రాంగణాల సందర్శనకు టికెట్‌ ధరలు రూ.వేలల్లో ఉంటాయన్నారు. సామాన్య ప్రజలను దృష్టిలో పెట్టుకొని అందుబాటులో ఉండేలా రూ.150 ప్రవేశ రుసుం కింద పెట్టినట్లు వెల్లడించారు. పైగా అక్కడ పూజల కోసం ఎటువంటి టికెట్లు లేవని.. ప్రసాదాలూ పూర్తి ఉచితమేనని వెల్లడించారు.

ఆ ఆలోచన మాకు లేదు.. రాదు..

‘‘రాజకీయాల్లో చేరాలనే ఆలోచన ఇప్పటివరకు రాలేదు. ఇకపై రాదు. మేం భిక్ష సన్యాసులం. మా పేరుతో బ్యాంకు ఖాతా కూడా ఉండదు. మాకు ఎవరితోనూ, ఎప్పుడూ ఎలాంటి వివాదాలు ఉండవు. మేం సమాజానికి కళ్ల లాంటి వాళ్లం. మా బాధ్యత మాకుంది. మేం ఎవరికీ భయపడం.. ఎవరి వెంటా పడం’’ అని చినజీయర్ స్వామి స్పష్టం చేశారు.