కాకినాడ జిల్లాలో పులి కలవరం.. బంధించేందుకు 120మంది సిబ్బంది

కాకినాడ: జిల్లాలో పులి సంచారం స్థానికులను కలవరపెడుతోంది. ప్రత్తిపాడు మండలంలో రాత్రి వేళ పశువులపై దాడి చేస్తూ, నీరు తాగేందుకు స్థానికంగా ఉన్న కాల్వల వద్దకు వస్తున్నట్లు అటవీశాఖ అధికారులు గుర్తించారు. ఒమ్మంగి, పోతులూరు, పొదురుపాక, శరభవరం, ధర్మవరం గ్రామాల్లో పశువులపై దాడి చేసి ఆరు గేదెల్ని చంపేసిందని వారు తెలిపారు. దీంతో పులిని బంధించేందుకు చర్యలు ముమ్మరం చేశారు.

ఈ క్రమంలో పోతులూరు వద్ద స్థానిక సర్పంచ్‌లతో అటవీశాఖ ఉన్నతాధికారుల సమావేశమయ్యారు. పులిని బంధించేందుకు ఈ సాయంత్రానికి అది సంచరించే ప్రాంతానికి బోన్లను తరలించనున్నారు. దాన్ని పట్టుకోవడానికి 120 మంది అటవీ సిబ్బందికి ప్రత్యేకంగా విధులు కేటాయించారు. అటవీశాఖ ముఖ్య అధికారి శరవనన్ ఆధ్వర్యంలో అధికారుల దీన్ని పర్యవేక్షిస్తున్నారు. పులిని బంధించేందుకు వారం రోజులు పట్టొచ్చని అధికారులు చెబుతున్నారు.