Polavaram: 50 ఎకరాల్లోని వరి కుప్పలు దగ్ధం

పోలవరం: ఏలూరు జిల్లా పోలవరం మండలం కొత్త పట్టి సీమకు సమీపంలో మంగళవారం మధ్యాహ్నం మొక్కజొన్న పొలంలో మంటలు వ్యాపించి దాదాపు 50 ఎకరాల్లోని వరి కుప్పలు దగ్ధమయ్యాయి. ప్రస్తుతం మొక్కజొన్న వేసిన పొలంలో ఖరీఫ్‌లో పండించిన వరి కుప్పలు వేశారు. మరో రెండు మూడు రోజుల్లో ఆ కుప్పలను నూర్చే ప్రయత్నంలో రైతులు ఉండగా అకస్మాత్తుగా ఈ అగ్నిప్రమాదం సంభవించింది. ఈ ప్రమాదంలో సుమారు 20 కుప్పలు కాలిపోయినట్లు రైతులు చెబుతున్నారు. ఎండ తీవ్రతకు తోడు ఈదురుగాలులు వీయడంతో క్షణాల్లో కుప్పలన్నీ కాలి బూడిదయ్యాయి. అప్పటికే ఇళ్లకు చేరుకున్న రైతులకు విషయం తెలియడంతో పరుగు పరుగున వెళ్లి కాలిపోయిన వరి కుప్పలను చూసి కన్నీరుమున్నీరయ్యారు. వరి కుప్పలతోపాటు అక్కడక్కడ మొక్కజొన్న పంటకు కూడా మంటలు అంటుకోవడంతో రైతులు ఆవేదన వ్యక్తం చేస్తున్నారు. విషయం తెలిసిన వెంటనే అధికారులు, ప్రజాప్రతినిధులు ఘటనా స్థలానికి చేరుకుని పరిశీలించారు.