Andhra News: ఒంటిమిట్టలో రాములోరి కల్యాణోత్సవం.. పోలీసుల ట్రాఫిక్‌ ఆంక్షలు

ఒంటిమిట్ట: వైఎస్‌ఆర్‌ జిల్లా ఒంటిమిట్టలోని శ్రీ కోదండరాముని కల్యాణోత్సవ వేడుకలకు తితిదే అధికారులు అన్ని ఏర్పాట్లు పూర్తిచేశారు. ఈరోజు రాత్రి 8 గంటల నుంచి 10 గంటల వరకు పండు వెన్నెల్లో శ్రీ సీతారాముల కల్యాణం నిర్వహించనున్నారు. సుమారు 52 వేల మంది భక్తులు కూర్చొని వీక్షించే విధంగా శాశ్వత కల్యాణ వేదికలో ఏర్పాట్లు చేశారు. ఈ వేడుకలకు సీఎం జగన్‌ హాజరై రాష్ట్ర ప్రభుత్వం తరఫున పట్టువస్త్రాలు సమర్పించనున్నారు.

రాములోరి కల్యాణం సందర్భంగా ఆ ప్రాంతంలో పోలీసులు ట్రాఫిక్‌ ఆంక్షలు అమలు చేస్తున్నారు. కడప-రేణిగుంట వైపు వెళ్లే వాహనాలను దారిమళ్లిస్తున్నారు. రేపు ఉదయం 6 గంటల వరకు ఈ ఆంక్షలు అమల్లో ఉండనున్నాయి. కల్యాణోత్సవానికి హాజరయ్యే భక్తుల వాహనాల పార్కింగ్‌ కోసం 15 చోట్ల ఏర్పాట్లు చేశారు. ఒంటిమిట్టలో సీతారాముల కల్యాణం సందర్భంగా ఎలాంటి అవాంఛనీయ ఘటనలు జరగకుండా కడప, ఒంటిమిట్ట ప్రాంతాల్లో భారీగా పోలీసులను మోహరించారు.