Black Circles: కళ్ల కింద నల్లని వలయాలున్నాయా..? ఎందుకు వస్తాయో తెలుసుకోండి..

ఇంటర్నెట్‌ డెస్క్‌: నిద్ర సరిగా లేకపోయినా, మానసిక ఒత్తిడి అధికంగా ఉన్నా కళ్ల కింద నల్లని వలయాలు ఏర్పడతాయి. వాటిని చూడగానే మానసిక సంఘర్షణకు లోనైనట్లు తెలిసిపోతుంది. ఆ నల్లని వలయాలను తగ్గించుకోవడానికి రకరకాల మందులు వాడుతుంటారు. కొంతమంది చర్మవ్యాధి నిపుణులను కలుస్తారు. వాస్తవానికి ఈ సమస్య ఇన్‌ఫెక్షన్లు, కంట్లో రక్తకణాలు దెబ్బతినడంతో పాటు వంశపారంపర్యంగా వస్తుందని వైద్యులు చెబుతున్నారు. ఈ వలయాలు ఎందుకొస్తాయి..? వాటికి ఏ పరిష్కార మార్గాలున్నాయో ప్రముఖ డెర్మటాలజిస్టు డాక్టర్‌ సందీప్‌ వివరించారు.

నలుపు సమస్యకు కారణాలెన్నో..

కళ్ల కింద నలుపు రావడానికి చాలా కారణాలుంటాయి. కళ్లద్దాలు వాడటం, అధిక పని ఒత్తిడి, మానసిక ఆందోళన, రక్తహీనత, హార్మోన్ల సమస్య, అధిక బరువు, పీసీవోడీలతో వస్తుంది. ఇది వ్యాధి కాదు. లక్షణం మాత్రమే. హిమోగ్లోబిన్‌ పెంచే ఆహారం తీసుకోవడంతో పాటు కంటికి విశ్రాంతి ఇస్తే చాలా వరకూ తగ్గిపోతుంది. స్మార్ట్‌ఫోన్లు, టీవీలు ఎక్కువ సేపు చూడటం కూడా మంచిది కాదు. కాస్మోటిక్స్‌ వాడటంతో కూడా నల్లని వలయాలు వస్తాయి.

ఏం చేస్తే పోతుందంటే..

ముందుగా జీవనశైలి మార్చుకోవాలి. వీటికి ఇచ్చే మందులు 40 శాతం మాత్రమే పని చేస్తాయి. హిమోగ్లోబిన్‌ పెంచుకోవాలి. నిద్ర సరిపోయినంత ఉన్నప్పుడు నలుపు తగ్గిపోతుంది. విటమిన్‌ సి ఎక్కువగా తీసుకోవాలి. కంటికింద కొబ్బరి నూనె రాసుకొని నిద్రపోవాలి. గులాబీ రేకులను మెత్తగా నలిపి కళ్ల కింద రాసుకోవచ్చు. పుచ్చకాయల గుజ్జు బాగానే పని చేస్తుంది.. ఆలుగడ్డ, కీరాలను చక్రాలుగా కోసి కళ్లపైన పెట్టుకోవాలి.