Ts High court: ఆ నలుగురికి గ్రూప్‌-1 హాల్‌టికెట్లు ఇవ్వండి: హైకోర్టు

హైదరాబాద్: టీఎస్‌పీఎస్సీ ప్రశ్నపత్రాల లీకేజీ కేసులో నిందితులుగా ఉన్న నలుగురికి గ్రూప్‌-1 ప్రిలిమ్స్‌ రాసే అనుమతి లభించింది. ఈ మేరకు హైకోర్టు ఆదేశాలు జారీ చేసింది.  షమీమ్‌, సురేశ్‌, రమేశ్‌, సాయి సుష్మిత అనే అభ్యర్థులు తమపై టీఎస్‌పీఎస్సీ విధించిన డీబార్‌ను ఎత్తివేయాలని కోరుతూ ఉన్నత న్యాయస్థానాన్ని ఆశ్రయించారు. దీనిపై విచారణ చేపట్టిన న్యాయస్థానం.. జూన్‌ 11న జరిగే గ్రూప్‌-1 ప్రిలిమ్స్‌ పరీక్షకు అనుమతి ఇచ్చింది. ఈ నలుగురికి హాల్‌టికెట్లు ఇవ్వాలని టీఎస్‌పీఎస్సీని ఆదేశించింది. కాగా.. పేపర్‌ లీకేజీ వ్యవహారంలో నిందితులుగా తేలిన 50 మంది నిందితులు పరీక్ష రాయకుండా టీఎస్‌పీఎస్సీ శాశ్వత డీబార్‌ విధించిన విషయం తెలిసిందే.