TS Lawcet: లాసెట్‌, పీజీఎల్‌ సెట్‌ షెడ్యూల్‌ ఖరారు.. ముఖ్యమైన తేదీలివే!

హైదరాబాద్‌: తెలంగాణలో లాసెట్‌(TS Lawcet) , పీజీఎల్‌ సెట్‌ (PGLCET) షెడ్యూల్‌ ఖరారైంది. మార్చి 1న లాసెట్‌, పీజీఎల్‌ సెట్‌ నోటిఫికేషన్‌ విడుదల చేయనున్నట్లు తెలంగాణ ఉన్నత విద్యామండలి ఛైర్మన్‌ ఆర్‌.లింబాద్రి వెల్లడించారు. దీనికి సంబంధించిన షెడ్యూల్‌ను ఉస్మానియా యూనివర్సిటీ వీసీ డి.రవిందర్‌, లాసెట్‌ కన్వీనర్‌ బి.విజయలక్ష్మీతో కలిసి ఆయన విడుదల చేశారు. మార్చి 2 నుంచి ఏప్రిల్‌ 6 వరకు లాసెట్‌, పీజీఎల్‌ సెట్‌కు దరఖాస్తులు స్వీకరించనున్నారు. ఆలస్య రుసుంతో మే 3 వరకు దరఖాస్తు చేసుకునే అవకాశం కల్పించారు. మే 16 నుంచి హాల్‌టికెట్లు జారీ చేయనున్నారు. మే 25న పరీక్ష నిర్వహించనున్నారు. పూర్తి వివరాల కోసం అధికారిక వెబ్‌సైట్‌ను సంద‌ర్శించవచ్చని అధికారులు సూచించారు.

ఈసెట్ షెడ్యూల్‌ ఇదే..

అదే విధంగా ఈసెట్ షెడ్యూల్‌నూ అధికారులు ఖరారు చేశారు. మార్చి 1న ఈసెట్ నోటిఫికేషన్ విడుదల చేయనుండగా.. మార్చి 2 నుంచి మే 2 వరకు దరఖాస్తులు స్వీకరించనున్నారు. ఆలస్య రుసుముతో మే 12 వరకు దరఖాస్తు చేసుకునే అవకాశం కల్పించారు. మే 15 నుంచి హాల్‌టికెట్లు జారీ చేసి 20వ తేదీన పరీక్ష నిర్వహించనున్నారు.