Hyderabad: మహిళలకు టీఎస్ఆర్టీసీ గుడ్‌న్యూస్‌.. రూ.80కే నగరమంతా తిరిగేయొచ్చు!

హైదరాబాద్‌: నగర మహిళలకు టీఎస్‌ఆర్టీసీ శుభవార్త చెప్పింది. గ్రేటర్ హైదరాబాద్ పరిధిలో సిటీ బస్సుల్లో ప్రయాణించే మహిళలకు టి-24 టికెట్‌ను రూ.80కే అందించాలని నిర్ణయించింది. ఈ మేరకు టీఎస్‌ఆర్టీసీ ఎండీ సజ్జనార్‌ ట్వీట్‌ చేశారు. సిటీ ఆర్డినరీ, మెట్రో ఎక్స్‌ప్రెస్‌ బస్సుల్లో రూ.100 ఉన్న టి-24 టికెట్‌ ధరను సాధారణ ప్రయాణికులకు రూ.90కి, సీనియర్‌ సిటిజన్లకు రూ.80కి ఇటీవల టీఎస్‌ఆర్టీసీ తగ్గించింది. తాజాగా మహిళా ప్రయాణికులకూ మరో రూ.10 తగ్గించి రూ.80కే అందించాలని నిర్ణయించింది. ఈ కొత్త టి-24 టికెట్‌ ధర మంగళవారం నుంచి అందుబాటులోకి రానుందని సజ్జనార్‌ ట్వీట్‌లో పేర్కొన్నారు.

హైదరాబాద్‌లో ఎక్కువగా ప్రయాణించే వారికోసం టి-24 టికెట్‌ను ఆర్టీసీ ఇటీవల అందుబాటులోకి తెచ్చింది. ఈ టికెట్‌ కొనుగోలు చేస్తే గ్రేటర్ హైదరాబాద్‌ పరిధిలోని సిటీ ఆర్డినరీ, మెట్రో బస్సుల్లో 24 గంటల పాటు ఎక్కడి నుంచి ఎక్కడికైనా ప్రయాణించవచ్చు. టి-24 టికెట్‌కు మంచి స్పందన వస్తోందని, ప్రతి రోజు సగటున 25వేల వరకు టికెట్లు అమ్ముడవుతున్నాయని ఇటీవల సజ్జనార్‌ వెల్లడించారు. సిటీ పరిధిలో తిరిగే ఆర్డినరీ, మెట్రో బస్సుల్లోని కండక్టర్ల వద్ద ఈ టికెట్‌ అందుబాటులో ఉంటుంది.