TTD: ఆ పరిస్థితిని మేం ఊహించే సిద్ధమైతే మాపైనే ఆరోపణలా?: ధర్మారెడ్డి

తిరుమల: టైమ్‌ స్లాట్‌ వల్ల భక్తులకు త్వరగా శ్రీవారి దర్శనం కల్పించామని తితిదే అదనపు ఈవో ధర్మారెడ్డి అన్నారు. ఈనెల 9, 10, 11 తేదీలకు సంబంధించి ఒకేరోజు టోకెన్లను పంపిణీ చేసినట్లు చెప్పారు. రెండు రోజుల విరామం అనంతరం కౌంటర్లు ఓపెన్‌ చేయాలని భావించామని.. వారాంతాల్లో దర్శనానికి వచ్చే వారి సంఖ్య పెరిగిందన్నారు. తిరుమలలో ఏర్పాటు చేసిన మీడియా సమావేశంలో ధర్మారెడ్డి మాట్లాడారు.

మొత్తం మూడు కౌంటర్లు కలిపి 18 నుంచి 20వేల మంది భక్తులు వచ్చారని ఆయన చెప్పారు. రోజుకు 35వేల చొప్పున దర్శన టోకెన్లు ఇచ్చేలా ఏర్పాట్లు చేశామన్నారు. భక్తులు ఎక్కువ సంఖ్యలో వస్తున్నారని తెలిసి కౌంటర్లు మూసేశామని.. అక్కడికే తిరుమల బస్సులను పంపించామని వివరించారు. టోకెన్లు లేకున్నా శ్రీవారిని దర్శించుకునే ఏర్పాట్లు చేశామని ధర్మారెడ్డి తెలిపారు. ముందుగానే వైకుంఠం-2 కాంప్లెక్స్‌ను సిద్ధం చేశామన్నారు. అన్ని సమస్యలనూ అధిగమించినందునే సాఫీగా దర్శనాలు సాగాయని చెప్పారు.

ముందు సిద్ధంగా ఉన్నందునే అరగంటలో భక్తులకు అన్ని సౌకర్యాలు కల్పించామని ధర్మారెడ్డి తెలిపారు. తాగునీరు, భోజనం, ఏసీలు, టీవీలు అన్నీ సిద్ధం చేశామని చెప్పారు. ఆ పరిస్థితిని మేం ఊహించే సిద్ధమైతే తమపై ఆరోపణలు చేస్తారా? అని ఆగ్రహం వ్యక్తం చేశారు. ఎప్పటికప్పుడు రకరకాల ప్రత్యామ్నాయాలను అన్వేషిస్తున్నామని ధర్మారెడ్డి వివరించారు. తితిదే అధికారుల నిర్లక్ష్యం అంటూ వ్యాఖ్యలు చేయొద్దని.. తమపై విమర్శలను ఖండిస్తున్నట్లు ఆయన చెప్పారు.