TTD: ఆనంద నిలయానికి బంగారు తాపడం... తితిదే పాలకమండలి కీలక నిర్ణయాలివే

తిరుమల: సామాన్య భక్తులకు ప్రాధాన్యత ఇస్తూ శ్రీవారి బ్రహ్మోత్సవాలు నిర్వహించామని తితిదే ఛైర్మన్‌ వైవీ సుబ్బారెడ్డి తెలిపారు. తితిదే పాలకమండలి సమావేశం బుధవారం తిరుమల అన్నమయ్య భవన్‌లో జరిగింది. ఈ సందర్భంగా పాలకమండలి తీసుకున్న నిర్ణయాలను ఛైర్మన్‌ సుబ్బారెడ్డి మీడియాకు వెల్లడించారు. వైకుంఠ ఏకాదశి సందర్భంగా  గతేడాది నిర్వహించినట్లు 10రోజుల పాటు ఆలయ ద్వారాలు తెరిచి ఉంచాలని నిర్ణయించినట్టు చెప్పారు.

తితిదే పాలకమండలి నిర్ణయాలు..

* తిరుపతి స్థానికులకు పలు ప్రదేశాల్లో దర్శన కౌంటర్ల ఏర్పాటు.

* సామాన్య భక్తులను దృష్టిలో ఉంచుకొని బ్రేక్‌ దర్శన సమయంలో మార్పు.

* నందకం అతిథి గృహంలో ఫర్నిచర్ల మార్పునకు రూ.2.95 కోట్లు.

* రెండో కనుమదారిలో రక్షణ గోడలకు రూ.9కోట్లతో ఆమోదం.

* తిరుమల స్థానిక బాలాజీనగర్‌లో డ్రైనేజీ పనులకు రూ.3.70 కోట్లు మంజూరు.

* జమ్మూకశ్మీర్‌లో నిర్మిస్తున్న ఆలయ ఘాట్‌రోడ్డు నిర్మాణం, భక్తుల సౌకర్యార్థం అభివృధ్ధి పనులకు రూ.7కోట్లు కేటాయింపు.

* జనవరి 2న శ్రీవారి ఆలయంలో వైకుంఠ ఏకాదశి. గతంలో మాదిరిగా 10రోజుల పాటు భక్తులకు వైకుంఠ ద్వార దర్శనం.

* 10 రోజులకు సంబంధించి తిరుపతిలో సర్వదర్శనం టోకెన్లు జారీ.

* జనవరి 2న రాజ్యాంగ హోదాలో వీఐపీలు స్వయంగా వస్తేనే  బ్రేక్‌ దర్శనం.

* టోకెన్లు పూర్తయ్యే వరకు తిరుపతిలో కౌంటర్లు తెరిచే ఉంటాయి.

* వైకుంఠ ద్వార దర్శనానికి సంబంధించి రోజుకు 25వేల చొప్పున పదిరోజులకు 2.5లక్షల రూ.300ల దర్శనం టికెట్లు ఆన్‌లైన్‌లో కేటాయింపు.

* ఆనంద నిలయం బంగారు తాపడం పనులకోసం ఫిబ్రవరి 23న బాలాలయం నిర్వహించాలని ముహూర్తం ఖరారు.

* శ్రీవారి మూలవిరాట్‌కు నిత్య సేవల నిర్వహణ, భక్తుల దర్శనం యథావిధిగా కొనసాగుతుంది.

* 1957, 1958లో జరిగినట్టే భక్తులు హుండీలో సమర్పించిన స్వర్ణకానుకలతో ఆనంద నిలయానికి బంగారు తాపడం పనులు చేయాలని నిర్ణయం.

* శ్రీవాణి ట్రస్ట్ ద్వారా ప్రస్తుతం 331 ఆలయాలు నిర్మాణ దశలో ఉన్నాయి. మరో 1100 పైగా ఆలయాలను త్వరితగతిన నిర్మాణాలు చేయాలని నిర్ణయం.

* తితిదే ఆసుపత్రుల్లో ఔషదాలు, సర్జికల్ పరికరాలు కొనుగోలుకు రూ.2.86 కోట్లు.

* లడ్డూ కౌంటర్లలో భారీ అవకతవకలకు పాల్పడిన కేవీఎం సంస్థపై చట్టపరమైన చర్యలు తీసుకోవాలని నిర్ణయం.

* కేవీఎమ్ సంస్థ కాంట్రాక్ట్ ను రద్దు చేసి, అక్రమాలకు పాల్పడిన వారిపై కేసులు పెట్టి ఆరెస్ట్ చేయాలని నిర్ణయం

* ఉద్యోగులు, కార్పోరేషన్ సిబ్బంది, శ్రీవారి సేవకులతో లడ్డూ కౌంటర్ల నిర్వహణ. 

* రూ.17,500 జీతం, వసతి సదుపాయం కల్పించి, కొత్త సిబ్బందిని కార్పోరేషన్ ద్వారా నియమించుకోవాలని నిర్ణయం.

* తిరుపతి తాతయ్య గుంట గంగమ్మ ఆలయ అభివృద్ధి పనులకు రూ.3.75 కోట్లు మంజూరు

* తితిదేలో పనిచేస్తున్న ఉద్యోగులు, సిబ్బందికి బ్రహ్మోత్సవాల బహుమానం.

* తితిదేలో పనిచేస్తున్న కాంట్రాక్ట్ కార్మికుల జీతభత్యాలపై కమిటీ వేయాలని నిర్ణయించినట్టు తితిదే పాలకమండలి ఛైర్మన్‌ సుబ్బారెడ్డి, ఈవో ధర్మారెడ్డి తెలిపారు.