BGMI: బీజీఎంఐలో 25లక్షల ఖాతాలు తొలగింపు

ఇంటర్నెట్‌ డెస్క్‌: పబ్‌జీ దేశీ వర్షన్‌ ‘బ్యాటిల్‌గ్రౌండ్స్‌ మొబైల్‌ ఇండియా(బీజీఎంఐ)’లో తాజాగా 25లక్షలకుపైగా మోసగాళ్ల ఖాతాలను గేమ్‌ను రూపొందించిన క్రాఫ్టన్‌ సంస్థ తొలగించింది. దేశంలో ‘పబ్‌జీ’ నిషేధానికి గురైన తర్వాత దానికి ప్రత్యామ్నాయంగా బీజీఎంఐ అందుబాటులోకి వచ్చిన విషయం తెలిసిందే. కోట్ల మంది యువత ఈ గేమ్‌ను ఆడుతున్నారు. ఈ క్రమంలో కొంతమంది ఆటలో మోసాలకు పాల్పడుతున్నారట. గేమ్‌ను హ్యాక్‌ చేసి లేదా ప్రత్యేక సాఫ్ట్‌వేర్‌లు ఉపయోగించి శత్రువులను ముందుగానే గుర్తించడం, ఆయుధాలను సేకరించడం వంటివి చేస్తూ తప్పుడు మార్గంలో ఆట గెలిచేందుకు ప్రయత్నిస్తున్నారు. 

ఇలా మోసపూరితంగా ఆడుతున్న వారి ఖాతాలపై గత కొన్ని నెలలుగా క్రాఫ్టన్‌ సంస్థ దృష్టి పెట్టింది. లక్షల సంఖ్యలో ఖాతాలను తొలగిస్తోంది. సెప్టెంబర్‌లో 1.40లక్షల ఖాతాలను తొలగించగా.. అక్టోబర్‌ 1 నుంచి నవంబర్‌ 10 మధ్య మొత్తం 25,19,262 ఖాతాలపై శాశ్వతంగా, 7,06,319 ఖాతాలపై తాత్కాలికంగా నిషేధం విధించింది. తాజాగా ఈ విషయాన్ని క్రాఫ్టన్‌ సంస్థ సోషల్‌మీడియా ద్వారా వెల్లడిస్తూ.. ‘‘బీజీఎంఐలో మోసపూరిత ఖాతాలను క్రాఫ్టన్‌ క్రమం తప్పకుండా తొలగిస్తూనే ఉంది. ఫలితంగా ఇప్పుడు బీజీఎంఐలో అలాంటి ఖాతాలు శూన్యం. ఈ గేమ్‌ సరదాగా ఆడుకోవడానికి మాత్రమే ఉద్దేశించింది. దాన్ని అలాగే కొనసాగించడానికి క్రాఫ్టన్‌ నిరంతరం కృషి చేస్తుంది’’అని సంస్థ పేర్కొంది.