రాష్ట్రాలకు 20 వేల బస్సులు.. తెలంగాణకు దక్కేవెన్నో?

ఈనాడు, హైదరాబాద్‌: కాలుష్యాన్ని నియంత్రించే క్రమంలో దేశవ్యాప్తంగా పట్టణ ప్రాంతాలకు 20వేల బస్సులు అందజేయాలని కేంద్రం తాజా బడ్జెటులో ప్రతిపాదించింది. ప్రభుత్వ-ప్రైవేటు భాగస్వామ్యంలో వాటిని కేటాయించనున్నట్లు కేంద్ర ఆర్థికమంత్రి నిర్మలాసీతారామన్‌ ప్రకటించారు. ఉపాధి కల్పనతో పాటు ప్రైవేటు పెట్టుబడిదారులను రవాణా రంగంలో మరింతగా భాగస్వాములను చేసేందుకు ఈ పథకం ఉపకరిస్తుందన్నది కేంద్రం వ్యూహం. ఆ 20వేల బస్సులను ఏయే రాష్ట్రాలకు ఎన్నేసి కేటాయించేదీ, వాటిలో తెలంగాణకు ఎన్ని దక్కేదీ స్పష్టత లేదు. ఫెమా ప్రాజెక్టు కింద కేంద్రం రాష్ట్రాలకు ఇప్పటికే విద్యుత్తు బస్సులను కేటాయించింది. వాటిని ప్రైవేటు సంస్థల నుంచి అద్దె ప్రాతిపదికన తీసుకున్నట్లు పేర్కొంది. ఫెమా-2 పథకం కింద కూడా రాష్ట్రానికి బస్సులను కేటాయించినా అదే సమయంలో తెలంగాణ ఆర్టీసీలో సుదీర్ఘ సమ్మెతో ఆ అవకాశాన్ని వినియోగించుకోలేదు. ఈ క్రమంలో పథకాన్ని ద్వితీయ శ్రేణి నగరాలైన ఖమ్మం, వరంగల్, కరీంనగర్, నిజామాబాద్‌లలో వినియోగించుకునేందుకు అవకాశం లేకపోలేదని ఆర్టీసీ అధికారి ఒకరు సోమవారం ‘ఈనాడు’తో చెప్పారు. ఈ బస్సులకు సంబంధించిన విధివిధానాలను కేంద్రం ఖరారు చేస్తే స్పష్టత వస్తుందన్నారు.