Will: ₹1.5 కోట్ల ఆస్తిని ప్రభుత్వం పేరిట రాసిన 85 ఏళ్ల వృద్ధుడు.. ఎందుకంటే?

ముజఫర్‌పూర్‌: సొంత పిల్లలపై కోపంతో ఉత్తర్‌ప్రదేశ్‌కు చెందిన నాథూ సింగ్‌ అనే 85 ఏళ్ల వృద్ధుడు అనూహ్య నిర్ణయం తీసుకున్నారు. రూ.1.5 కోట్లు విలువ చేసే తన ఆస్తిని ప్రభుత్వం పేరిట వీలునామా రాశారు. తాను మరణించిన తర్వాత శవాన్ని వైద్యకళాశాలకు అప్పగించాలని కోరారు. తన కొడుకు, కూతుళ్లు కనీసం తన శవాన్ని కూడా తాకొద్దని వీలునామాలో పేర్కొనడం గమనార్హం.

ముజఫర్‌పూర్‌కు చెందిన నాథూసింగ్‌కు ఓ ఇల్లు, స్థలం ఉన్నాయి. వాటి విలువ రూ.1.5 కోట్లు. ఆయనకు ఓ కొడుకు, నలుగురు కూతుళ్లు ఉన్నారు. వారందరికీ పెళ్లిళ్లయ్యాయి. కొడుకు సహరాన్‌పూర్‌లో ఉపాధ్యాయుడిగా పనిచేస్తున్నారు. భార్య చనిపోయిన తర్వాత నాథూ సింగ్‌ చాలా కాలం ఒంటరిగానే గడిపారు. ఏడు నెలల క్రితం సొంత ఊళ్లోనే ఉన్న ఓ వృద్ధాశ్రమానికి మారారు.

అయితే, కనీసం చూడడానికి కూడా తనవారెవరూ రాకపోవడంతో నాథూ సింగ్‌ మనసు విరిగింది. తన ఆస్తి మొత్తాన్ని ప్రభుత్వ పేరిట రాయాలని నిశ్చయించుకున్నారు. తన మరణం తర్వాత ఆ స్థలంలో ఆసుపత్రి, స్కూల్‌ నిర్మించాలని కోరారు. ‘‘ఈ వయసులో నేను నా కొడుకు, కోడలితో ఉండాల్సింది. కానీ, వాళ్లు నన్ను బాగా చూసుకోవడం లేదు. అందుకే నేను నా ఆస్తిని ప్రభుత్వానికి బదిలీ చేయాలని నిర్ణయించుకున్నాను’’ అని నాథూ సింగ్‌ ఓ మీడియా సంస్థతో అన్నారు.

నాథూ సింగ్‌ వృద్ధాశ్రమంలో చేరినప్పటి నుంచి ఆయన్ని చూడడానికి ఎవరూ రాలేదని ఆశ్రమ మేనేజర్‌ రేఖా సింగ్‌ తెలిపారు. ఆయన చాలా కుంగుబాటుకు లోనయ్యారని.. అందుకే ఆస్తి బదిలీ విషయంలో చాలా మొండిగా ఉన్నట్లు పేర్కొన్నారు. మరోవైపు నాథూ సింగ్‌ నుంచి తమకు అఫిడవిట్‌ అందినట్లు స్థానిక సబ్‌-రిజిస్ట్రార్‌ తెలిపారు. నాథూ సింగ్‌ మరణం తర్వాత ఆ వీలునామా అమల్లోకి వస్తుందని పేర్కొన్నారు.