Andhra News: నెల్లూరులో ఆకాశవాణి నూతన టవర్‌ను ప్రారంభించిన ఉపరాష్ట్రపతి వెంకయ్య

నెల్లూరు: నగరంలోని ఆకాశావాణి రేడియో కేంద్రంలో నూతనంగా ఏర్పాటుచేసిన 100 మీటర్ల టవర్‌ను ఉపరాష్ట్రపతి వెంకయ్యనాయుడు ప్రారంభించారు. గతంలో ఉన్న ఫ్రీక్వెన్సీ పరిధిని పెంచుతూ ఏర్పాటు చేసిన టవర్‌ను ఉపరాష్ట్రపతి జాతికి అంకితం చేశారు. అనంతరం ఆకాశవాణి స్టూడియోను ఆయన పరిశీలించారు. ఈ సందర్భంగా నిర్వహించిన కార్యక్రమంలో వెంకయ్య మాట్లాడుతూ 100 మీటర్ల టవర్‌ను ప్రారంభించినందుకు ఆనందంగా ఉందని.. ఈ కేంద్రం ఏర్పాటులో తాను కూడా భాగస్వాముడిని కావడం అదృష్టంగా భావిస్తున్నానని చెప్పారు. విదేశాలల్లో మన సంస్కృతికి మంచి పేరుందని.. మన యాస, సంప్రదాయాలను ముందు తరాలకు అందించడం మన బాధ్యతన్నారు. ఇక్కడి యాస, భాషలను పరిశీలించి కార్యక్రమాలను చేపట్టాల్సిన బాధ్యత రేడియో కేంద్రం అధికారులపై ఉందని చెప్పారు. వరదల సమయంలో ఆకాశవాణి కేంద్రం అందించిన సేవలు అభినందనీయమని వెంకయ్యనాయుడు కొనియాడారు.