Viral Photo: ఈ పిల్లాడి పనికి సోషల్‌ మీడియా ఫిదా.. వైరల్‌గా మారిన ఫొటో..

ఇంటర్నెట్‌ డెస్క్‌: ఇతరులపై జాలి, దయ చూపించడానికి వయసుతో సంబంధం లేదని రుజువు చేశాడో పిల్లాడు. తను చేసిన పనితో అందరి హృదయాలను గెలుచుకున్నాడు. తన బాటిల్‌లోని నీటిని రోడ్డు మీద ఉన్న వృద్ధులకు అందిస్తూ ఉన్న ఈ ఫొటో ఇప్పుడు సోషల్‌ మీడియాలో వైరల్‌గా మారింది. దీనిని ఓ ఐఏయస్‌ అధికారి తన ట్విటర్‌ ఖాతాలో పోస్టు చేశారు. చిన్నప్పటి నుంచే దయాగుణం అలవాటు చేసుకుంటే పెద్దయ్యాక ప్రపంచాన్ని మార్చే శక్తి వస్తుందంటూ సందేశం ఇచ్చారు. ఈ ఫొటోకు ‘దయ సహజసిద్ధంగా వస్తుంది. ద్వేషం ఎవరైనా నేర్పితేనే అలవాటు అవుతుంది’ అని క్యాప్షన్‌ పెట్టారు. షేర్‌ చేసిన కొన్ని నిమిషాల్లోనే ఈ ఫొటోకు కొన్ని వేలల్లో లైక్స్‌, రీట్వీట్‌లు వచ్చాయి. దీనిని చూసిన వీక్షకులు మానవత్వానికి ప్రత్యక్ష ఉదాహరణ, ఇలాంటి మంచి అలవాట్లను చిన్నప్పటి నుంచే పిల్లలకు నేర్పాలంటూ వారి భావాలను కామెంట్స్‌లో పంచుకుంటున్నారు.