Viral Video:నేస్తమా.. నన్ను వదిలి వెళ్లిపోతున్నావా.. వైరల్ అవుతున్న నెమలి వీడియో

ఇంటర్నెట్ డెస్క్‌: మనుషుల మాదిరిగానే పశుపక్ష్యాదులు భావోద్వేగాలు ప్రదర్శిస్తాయని మనలో చాలామంది వినే ఉంటారు.  పిల్లలు కాసేపు కనిపించకపోతే అల్లలాడిపోవడం, ఏదైనా జంతువు నుంచి అపాయం తలెత్తితే దానితో పోరాడి పిల్లల్ని కాపాడుకోవడం, యాజమాని పట్ల విశ్వాసం ప్రదర్శించడం వంటివి కూడా ఈ కోవలోకే వస్తాయి. ఓ నెమలి కూడా ఈ విధంగా భావోద్వేగాన్ని ప్రదర్శించింది. ఇన్నాళ్లు తనతో ఉన్న నెమలి అనుహ్యంగా మరణించడంతో ఆ పక్షి అల్లలాడింది. ఇండియన్ ఫారెస్ట్ సర్వీస్ ఆఫీసర్ పర్వీన్ కాస్వాన్‌ తన ట్విటర్‌ ఖాతాలో పోస్ట్‌ చేశారు. ఈ వీడియో నెటిజన్ల హృదయాలను కరిగిస్తోంది. 

రాజస్థాన్‌లోని కుచేర ప్రాంతంలో రామస్వరూప్ బిష్ణోయ్ అనే వ్యక్తి ఇంటి వద్ద రెండు నెమళ్లు ఉండేవి. వాటికి ఆయన ప్రతిరోజూ తిండిగింజలు వేస్తుండేవాడు. అలా నాలుగేళ్లు గడిచిపోయింది. అయితే అందులో ఓ నెమలి ఈ మధ్యే మృతి చెందింది. దీంతో ఆయన ఇద్దరు వ్యక్తులను పిలిపించి ఆ నెమలిని గోతి తీసి పూడ్చమని చెప్పాడు. నెమలి కళేబేరాన్ని పూడ్చడానికి తీసుకువెళ్తున్న క్రమంలో.. ఇన్నాళ్లు దానితో ఉన్న మరో నెమలి వారి వెంటసాగింది. నెమలిని ఖననం చేసేవరకు అక్కడే ఉందని రామస్వరూప్ పేర్కొన్నాడు. నెమలి పరుగులు తీసిన వీడియోను  2 లక్షల మందికిపైగా వీక్షించారు.