విశాఖ కంటైనర్‌ టెర్మినల్‌ వద్ద మత్స్యకారుల ఆందోళన.. నిలిచిపోయిన రూ.వేల కోట్ల లావాదేవీలు

విశాఖ: విశాఖ కంటైనర్‌ టెర్మినల్‌ వద్ద మత్స్యకారులు నిరసనకు దిగారు. 20 ఏళ్ల క్రితం విశాఖ కంటైనర్‌ టెర్మినల్‌కు భూములిచ్చిన సమయంలో 60 గజాల ఇంటి స్థలం, రూ.లక్ష పరిహారం, ఇంటికో ఉద్యోగం అంటూ ఇచ్చిన హామీలను ఇప్పటివరకు అమలు పరచలేదని ఆందోళనకు దిగారు. ఈ నేపథ్యంలో కంటైనర్‌ టెర్మినల్‌కు వెళ్లే మార్గంలో మత్స్యకారులు నిరసన తెలిపారు. దీంతో ఇవాళ ఉదయం నుంచి కంటైనర్ టెర్మినల్ కార్యకలాపాలు నిలిచిపోయాయి. రూ.వేల కోట్ల లావాదేవీల ఎగుమతులు, దిగుమతులు ఆగిపోయాయని అక్కడి అధికారులు వెల్లడించారు. ఏకంగా షిప్‌లను అడ్డుకునేందుకు 25కు పైగా బోట్లలో మత్స్యకారులు సముద్రంలోకి వెళ్లారు. మర పడవలను అడ్డుపెట్టి టెర్మినల్ వైపు వాణిజ్య ఓడలు రాకుండా అడ్డుకున్నారు.

విశాఖ కంటైనర్ టెర్మినల్ నిర్మాణ సమయంలో భూములు ఇచ్చిన నిర్వాసితులకు ఇచ్చిన హామీలను నెరవేర్చేందుకు ఈ నెల 20వ తేదీ వరకు గడువు ఇచ్చినా, అధికారులు పట్టించుకోక పోవడంతో నిరసనకు దిగినట్లు మత్స్యకార సంఘం నాయకులు వెల్లడించారు. పరిహారం విషయం తేల్చే వరకూ టెర్మినల్ ప్రధాన గేట్లు తెరిచేది లేదని.. ఒక్క కంటైనర్ కూడా లోపలకి వెళ్లేందుకు వీల్లేదని మత్స్యకారులు తేల్చి చెప్పారు.