Andhra News: 2022-23 నాటికి విశాఖ హెచ్‌పీసీఎల్‌ రిఫైనరీ ఆధునికీకరణ: కేంద్రం

దిల్లీ: విశాఖలోని హెచ్‌పీసీఎల్‌ రిఫైనరీ ఆధునికీకరణ వ్యయంపై కేంద్ర ప్రభుత్వం వివరణ ఇచ్చింది. ఆధునికీకరణ వ్యయం సవరించినట్లు పెట్రోలియం శాఖ రాజ్యసభకు తెలిపింది. ప్రస్తుతం ఉన్న రూ.20,928 కోట్ల వ్యయాన్ని రూ.26,264 కోట్లకు సవరించినట్లు వెల్లడించారు. వైకాపా సభ్యుడు విజయసాయిరెడ్డి అడిగిన ప్రశ్నకు కేంద్ర మంత్రి రామేశ్వర్‌ తేలి లిఖితపూర్వక సమాధానం ఇచ్చారు. ప్రాజెక్టును 2016లో హెచ్‌పీసీఎల్‌ ఆమోదించిందని.. మొదట 2020 జులై నాటికి ప్రాజెక్టును పూర్తి చేయాలని లక్ష్యంగా పెట్టుకున్నట్లు కేంద్ర మంత్రి తెలిపారు. 2022 ఫిబ్రవరి నాటికి 85 శాతం పనులు పూర్తి అయ్యాయన్నారు. సమవరించిన లక్ష్యం ప్రకారం 2022-23 నాటికి ప్రాజెక్టును పూర్తి చేస్తామని రామేశ్వర్‌ తేలి స్పష్టం చేశారు.