IMD: తెలంగాణలో రాగల 3 రోజులు తేలికపాటి నుంచి మోస్తరు వర్షాలు

హైదరాబాద్‌: తెలంగాణలో అక్కడక్కడ రేపు ఉరుములతో కూడిన వర్షాలు (Heavy Rains) కురిసే అవకాశం ఉందని హైదరాబాద్‌ వాతావరణ కేంద్రం (IMD) వెల్లడించింది. అదేవిధంగా రాగల 3 రోజులపాటు తేలికపాటి నుంచి మోస్తరు వర్షాలు కురుస్తాయని వాతావరణ కేంద్ర సంచాలకులు ఓ ప్రకటనలో పేర్కొన్నారు. నిన్న ఉదయం ఏర్పడిన తీవ్ర వాయుగుండం బలహీనపడి.. సాయంత్రం వాయుగుండంగా, ఇవాళ ఉదయం ఐదున్నర గంటలకు తీవ్ర అల్పపీడనంగా మారిందని వివరించారు. ప్రస్తుతం ఈ అల్పపీడనం కూడా బలహీనపడిందని వెల్లడించారు.

ముసురుపట్టిన భాగ్యనగరం..

మరోవైపు మాండౌస్‌ (Mandous Cyclone) తుపాను ప్రభావంతో భాగ్యనగరమంతా ముసురుపట్టింది. నగరంలోని పలు ప్రాంతాల్లో నిన్న సాయంత్రం నుంచి ఓ మోస్తరు వర్షం కురుస్తోంది. ఉదయం నుంచి ట్యాంక్ బండ్, లిబర్టీ, హిమాయత్ నగర్, నారాయణ గూడ, బషీర్ బాగ్, లక్డీ కపూల్‌, నాంపల్లి, బేగంబజార్, కోఠి, సుల్తాన్ బజార్ తదితర ప్రాతాల్లో చిరు జల్లులు కురుస్తున్నాయి. వివిధ పనులపై బయటకు వచ్చిన వాహనదారులు, బాటసారులు తడిసిముద్దయ్యారు.