DTH Recharge: డీటీహెచ్‌ రీఛార్జి చేయలేదని విడాకులు కోరిన భార్య!

ఇంటర్నెట్‌ డెస్క్‌: నగలు కొనలేదనో.. బయటకు తీసుకెళ్లలేదనో అలిగే భార్యలను చూసుంటారు. తాగొచ్చి హింసిస్తున్నాడనో.. కొట్టాడనో కారణంతో ఇల్లు వదిలి పుట్టింటికి వెళ్లేవారి గురించి వినే ఉంటారు. కానీ, ఇక్కడో ఇల్లాలు డీటీహెచ్‌ రీఛార్జి చేయలేదన్న కారణంతో భర్తపై అలిగి పుట్టింటికి వెళ్లిపోయింది. అంతేకాదు.. రీఛార్జి చేయలేని భర్త నుంచి తనకు విడాకులు ఇప్పించాలని కోరింది. ఈ ఘటన ఛత్తీస్‌గఢ్‌లోని బిలాస్‌పూర్‌లో జరిగింది.

ఇటీవల వెలుగుచూసిన ఈ ఘటనకు సంబంధించిన వివరాలు ఇలా ఉన్నాయి.. టీవీ లేకుండా ఒక్క క్షణం లేకుండా ఉండలేని ఆ భార్య డీటీహెచ్‌ రీఛార్జి అయిపోవడంతో భర్తను రీఛార్జి చేయమని కోరింది. అయితే, ప్రస్తుతం తన వద్ద డబ్బులు లేవని సమాధానం చెప్పాడు భర్త. ఇదే అతగాడు చేసిన తప్పు. వెంటనే ఇల్లొదిలి ఆ ఇల్లాలు పుట్టింటికి వెళ్లిపోయింది. వెళ్లే ముందు ‘టీవీ లేకుంటే పెళ్లామూ ఉండదు’ అంటూ రైమింగ్‌లో ఓ డైలాగ్‌ చెప్పి మరీ వెళ్లిపోయింది. అప్పటికీ అతగాడు సాయంత్రం పనికెళ్లి వచ్చి రీఛార్జి చేయిస్తానని మాటిచ్చినా ఆమె వినలేదు. తీరా పుట్టింటికి వెళ్లాక తనకు విడాకులు కావాలని పట్టుపట్టింది.

ఈ వ్యవహారం పోలీసులకు చేరడంతో వారు సైతం కంగుతిన్నారు. ‘ఇదేం కేసురా బాబూ’ అనుకుంటూనే విధి నిర్వహణలో భాగంగానే భార్యభర్తలను పిలిపించి కౌన్సెలింగ్‌ ఇప్పించారు. జీవితంలో ఇలాంటివి సహజం అంటూ కౌన్సెలింగ్‌ ఇచ్చారు. కొన్ని రోజుల కౌన్సెలింగ్‌ తర్వాత భార్యాభర్తలు మళ్లీ ఒక్కటయ్యారు. ఇంత జరిగాక రీఛార్జి చేశాడో లేదో ఇంతకీ ఈ బాసు!?