Andhra News: 1064 బస్సులను ఆధునీకరిస్తాం: ఆర్టీసీ ఎండీ

అమరావతి: ‘బస్సులో గొడుగు’ శీర్షికన ఆదివారం ఈనాడులో ప్రచురితమైన వార్తకు ఆర్టీసీ ఎండీ ద్వారకా తిరుమలరావు స్పందించారు. సాలూరు డిపోకు చెందిన ఆల్ట్రా డీలక్స్‌ బస్సు టాప్‌ లీకేజీ జరిగిందని.. వెంటనే ఆ బస్సును ఆపి మరమ్మతులు చేపట్టామని ఆయన తెలిపారు. దీనికి కారణమైన సంబంధిత సిబ్బందిపై క్రమశిక్షణా చర్యలకు ఆదేశించినట్లు తెలిపారు. బస్సులన్నీ తనిఖీ చేసి, లీకేజీ ఉన్న బస్సులను వెంటనే ఆపివేయాలని ఆదేశించినట్లు వెల్లడించారు. మరమ్మతులు చేసిన తర్వాతే సర్వీసులు తిరిగి ప్రారంభించాలని సూచించామని తెలిపారు. రాష్ట్ర వ్యాప్తంగా 1321 పల్లెవెలుగు, సిటీ ఆర్డినరీ బస్సులను రూ.15 కోట్లతో నవీకరణ చేసినట్లు ఎండీ తెలిపారు. సూపర్‌ లగ్జరీ, ఆల్ట్రా డీలక్స్‌, ఎక్స్‌ప్రెస్ కలిపి మొత్తం 1064 బస్సులను వచ్చే మార్చి లోపు ఆధునీకరించనున్నట్లు వెల్లడించారు. బస్సుల కండీషన్‌ను మెరుగుపరిచి ప్రయాణికులు ఎలాంటి ఇబ్బందులు తలెత్తకుండా సౌకర్యవంతంగా మలుస్తున్నామన్నారు. ఇలాంటి ఘటనలు భవిష్యత్తులో పునరావృతం కాకుండా చర్యలు తీసుకుంటున్నట్లు ద్వారకా తిరుమలరావు తెలిపారు.