రోడ్డుపైనే గర్భిణి ప్రసవం

న్యాలకల్: సంగారెడ్డి జిల్లా న్యాలకల్ మండలంలో దారుణ ఘటన చోటు చేసుకుంది. ప్రసవం కోసం వచ్చిన ఓ మహిళ అస్పత్రికి తాళం వేసి ఉండటంతో రోడ్డుపైనే బిడ్డకు జన్మనిచ్చింది. న్యాలకల్ మండలం రేచింతల్‌కు చెందిన పూజితకు పురిటి నొప్పులు రావడంతో కుటుంబ సభ్యులు ఉదయం 7:30 సమయంలో మీర్జాపూర్‌లోని ప్రభుత్వ ఆస్పత్రికి తీసుకొచ్చారు. ఆస్పత్రికి తాళం వేసి ఉండటం, సిబ్బంది ఎవరూ అందుబాటులో లేకపోవడంతో అప్పటికే నొప్పులు భరించలేకపోతున్న మహిళ రోడ్డుపైనే ప్రసవించింది. అనంతరం తల్లీబిడ్డను జహీరాబాద్ ప్రాంతీయ ఆస్పత్రికి తరలించారు. ప్రస్తుతం ఇద్దరి ఆరోగ్యం నిలకడగా ఉన్నట్లు బంధువులు తెలిపారు. మీర్జాపూర్‌లో 24 గంటలు సేవలు అందించేలా 30 పడకలతో ఆస్పత్రిని నిర్మించినా ఉపయోగం లేదని స్థానికులు వాపోతున్నారు. ప్రభుత్వం ఇప్పటికైనా స్పందించి ఆస్పత్రిపై దృష్టి సారించాలని కోరుతున్నారు.