Ts High Court: వైఎస్‌ షర్మిల బయటకు వెళ్లకుండా ఆంక్షలు విధించవద్దు: హైకోర్టు

హైదరాబాద్: వైతెపా అధ్యక్షురాలు వైఎస్ షర్మిలను ఇంటి నుంచి బయటకు వెళ్లకుండా అడ్డుకోరాదని పోలీసులకు హైకోర్టు స్పష్టం చేసింది. షర్మిల ఇంటి వద్ద బ్యారికేడ్లను తొలగించాలని ఉన్నత న్యాయస్థానం ఆదేశించింది. హైకోర్టు ఆదేశించినప్పటికీ పాదయాత్రకు వెళ్లకుండా తనను గృహ నిర్బంధం చేశారంటూ షర్మిల ఇవాళ లంచ్ మోషన్ పిటిషన్‌ దాఖలు చేశారు. గృహ నిర్బంధం చేసి వ్యక్తిగత స్వేచ్ఛను పోలీసులు కాలరాస్తున్నారని షర్మిల తరఫు న్యాయవాది వాదనలు వినిపించారు. పాదయాత్రను అడ్డుకునేందుకు పోలీసులు చట్టవిరుద్ధంగా వ్యవహరిస్తున్నారన్నారు. కార్యకర్తలను కూడా పార్టీ కార్యాలయానికి రానీయడం లేదని కోర్టు దృష్టికి తీసుకెళ్లారు.

ప్రగతిభవన్ ముట్టడి, అనుమతి లేకుండా రాజ్‌భవన్‌కు వెళ్లడం వంటి ఘటనలతో షర్మిల శాంతిభద్రతలు, ట్రాఫిక్ రాకపోకలకు విఘాతం కలిగించారని ప్రభుత్వం తరఫు న్యాయవాది కోర్టుకు తెలిపారు. అయితే, షర్మిల నిబంధనలు ఉల్లంఘిస్తే పోలీసులు చట్టపరంగా తగిన చర్యలు తీసుకోవచ్చు కానీ.. ఆ కారణం చూపించి ఆమెను గృహ నిర్బంధం చేయడానికి వీల్లేదని హైకోర్టు స్పష్టం చేసింది. పోలీసుల నుంచి ముందస్తు అనుమతి తీసుకున్న తర్వాతే.. పాదయాత్రలు, ధర్నాలు, ప్రదర్శనలు చేపట్టాలని షర్మిలను హైకోర్టు ఆదేశించింది. లోటస్ పాండ్ వద్ద ఏర్పాటు చేసిన బ్యారికేడ్లు తొలగించి వాహనాల రాకపోకలు పునరుద్ధిరించాలని హైకోర్టు ఆదేశించింది.