అఫ్గాన్‌లో బాంబు పేలుడు.. 16 మంది మృతి

90 మందికి పైగా గాయాలు 

కాబూల్‌: అఫ్గానిస్థాన్‌లో బాంబు పేలుళ్లు, ఆత్మాహుతి దాడుల పరంపర కొనసాగుతోంది. తాజాగా ఆదివారం ఆత్మాహుతిదాడిగా అనుమానిస్తున్న మినీ బస్‌ బాంబు పేలుడు ఘటనలో 16 మంది మృతి చెందారు. 90 మందికి పైగా గాయపడ్డారు. వీళ్లలో చాలా మంది పరిస్థితి విషమంగా ఉన్నట్లు అధికారులు వివరించారు. ఆ దేశంలోని పశ్చిమ ఘోర్‌ ప్రావిన్స్‌లో పెద్ద మొత్తంలో పేలుడు పదార్థాలు ఉన్న మినీ బస్సు వల్ల పేలుడు సంభవించినట్లు స్థానిక అధికారులు నిర్ధరించారు. క్షతగాత్రులను గుర్తించే పనిలో ఉన్న అధికారులు మృతుల సంఖ్య పెరిగే అవకాశం ఉందని తెలిపారు. ఇదిలా ఉంటే ఈ ఘటనపై బాధ్యత వహిస్తున్నట్లు ఏ ఉగ్రవాద సంస్థ ఇప్పటి వరకూ ప్రకటించలేదు.