Corona: ఐఐటీ మద్రాస్‌లో కరోనా కలకలం.. రెండ్రోజుల్లోనే 30 కేసులు..!

చెన్నై: మద్రాస్‌ ఐఐటీలో కరోనా కలకలం సృష్టిస్తోంది. నిన్న 12 మందికి కరోనా సోకగా.. తాజాగా మరో 18 మంది వైరస్ బారినపడ్డారు. దాంతో అక్కడ రెండు రోజుల వ్యవధిలో కేసుల సంఖ్య 30కి చేరుకుంది. ఈ మేరకు శుక్రవారం అధికారులు వెల్లడించారు. ప్రస్తుతం దేశంలో కరోనా కేసులు మళ్లీ పెరుగుతున్నాయి. నిన్న దేశం మొత్తం మీద 2,451 మందికి కరోనా సోకగా.. తమిళనాడులో ఆ సంఖ్య 39గా ఉంది. పాజిటివ్‌ కేసులు పెరుగుతుండటంతో నిర్ధారణ పరీక్షల సంఖ్య పెంచాలని అక్కడి ప్రభుత్వం నిర్ణయించింది. అలాగే కొన్ని రాష్ట్రాలు మాస్కులు ధరించడంపై సడలింపులు ఇచ్చినప్పటికీ.. తమిళనాడు ప్రభుత్వం ఆ తరహా ప్రకటన చేయలేదు. ప్రజలు కొవిడ్‌ నిబంధనలు పాటించే విషయంలో అలసత్వం ప్రదర్శించవద్దంటూ దిల్లీలో కేసులు పెరుగుతున్న విషయాన్ని గుర్తుచేసింది. అజాగ్రత్తగా ఉంటే ఇక్కడా అదే పరిస్థితి రావొచ్చని హెచ్చరించింది.