Bihar: మధ్యాహ్న భోజనం తిని 200 మంది విద్యార్థులు ఆస్పత్రిపాలు..!

ఇంటర్నెట్‌డెస్క్‌: బల్లి పడినట్లు అనుమానిస్తున్న మధ్యాహ్న భోజనాన్ని బలవంతంగా తినిపించడంతో 200 మంది విద్యార్థులు ఆస్పత్రిపాలైన ఘటన బిహార్‌లోని భాగల్పూర్‌లో చోటు చేసుకొంది. మధ్యాహ్న భోజనం చేసిన విద్యార్థులు ట్యూషన్‌ క్లాసులకు వెళ్లగా.. అక్కడ ఒకరికి వాంతులయ్యాయి. ఆ తర్వాత కొద్దిసేపటికే మిగిలిన విద్యార్థులు కూడా అనారోగ్యానికి గురయ్యారు. దీంతో పాఠశాల సమీపంలోని ఓ వైద్యకేంద్రానికి విద్యార్థులను తరలించి పోలీసులకు సమాచారం అందించారు.

8వ తరగతి విద్యార్థి ప్లేట్‌లో చనిపోయిన బల్లి కనిపించడంతో ఈ విషయాన్ని విద్యార్థులు ప్రధానోపాధ్యాయుడి దృష్టికి తీసుకెళ్లారు. కానీ, ఆయన దానిని బల్లి కాదని.. వంకాయని విద్యార్థులకు చెప్పాడు. పాఠశాల అధికారులు కూడా విద్యార్థులను ఆహారం తినాలని బలవంతం చేశారు. ఆ ఆహారం తిన్న తర్వాతే విద్యార్థులు అస్వస్థతకు గురయ్యారు. ఈ ఘటనను విద్యా శాఖ తీవ్రంగా పరిగణించింది. పోలీసులు కూడా ఈ ఘటనపై దర్యాప్తు చేపట్టారు. ప్రధానోపాధ్యాయుడు, సిబ్బంది తప్పు చేసినట్లు తేలితే అరెస్టు చేస్తామని పేర్కొన్నారు. డీఎస్పీ స్థాయి అధికారి ఒకరు వైద్యశాల వద్ద పరిస్థితిని పర్యవేక్షిస్తున్నారు.