Metro Station: మెట్రో స్టేషన్‌ పైనుంచి దూకిన ఆ యువతి మృతి

దిల్లీ: దేశ రాజధాని దిల్లీలోని అక్షరధామ్‌ మెట్రో స్టేషన్‌ గోడపైకి ఎక్కి ఓ యువతి ఆత్మహత్యాయత్నానికి ప్రయత్నించగా ఆమెను CISF సిబ్బంది ప్రాణాలతో కాపాడిన విషయం తెలిసిందే. అయితే గాయాలపాలైన ఆ యువతి శుక్రవారం ప్రాణాలు కోల్పోయింది. ఆమెను ఆసుపత్రిలో చేర్పించగా చికిత్స పొందుతూ శుక్రవారం మృతిచెందింది. ఆమెను పంజాబ్‌కు చెందిన యువతి (22)గా గుర్తించారు.

గురువారం ఉదయం 7.30 గంటల సమయంలో స్టేషన్‌లోని ప్లాట్‌ఫాం నంబర్‌ 2 అంచుకు వెళ్లి నిలబడిన సదరు యువతిని కొందరు ప్రయాణికులు గమనించి సమాచారం ఇవ్వగా.. అప్రమత్తమైన సిబ్బంది హుటాహుటిన అక్కడికి చేరుకొన్నారు. ఆత్మహత్య చేసుకోవద్దంటూ ఎంతగానో నచ్చజెప్పేందుకు ప్రయత్నించినా ఆమె పట్టించుకోకుండా ఒక్కసారిగా కిందకు దూకేసింది. దీంతో స్థానికుల సాయంతో సీఐఎస్‌ఎఫ్‌ సిబ్బంది ముందు జాగ్రత్తగా ఏర్పాటు చేసిన బ్లాంకెట్‌తో ఆమెను పట్టుకున్నారు. దాదాపు 40 అడుగుల ఎత్తు నుంచి దూకడంతో యువతికి గాయాలయ్యాయి. వెంటనే ఆమెను స్థానికంగా ఓ ఆస్పత్రికి తరలించగా చికిత్స పొందుతూ మరణించింది.