జపాన్‌లో భారీ వర్షాలు

విరిగిపడ్డ కొండ చరియలు.. 80 మంది గల్లంతు

ఇంటర్నెట్‌ డెస్క్‌: జపాన్‌ రాజధాని టోక్యోకు 100 కిలోమీటర్ల దూరంలో ఉన్న అతామీ పట్టణంలో గత మూడు రోజులుగా భారీ వర్షాలు కురుస్తున్నాయి. ఫలితంగా కొండ చరియలు ఒక్కసారిగా విరిగి, ఇళ్లపై పడ్డాయి. ఈ ప్రమాదంలో 80 మంది గల్లంతయ్యారు. ఇప్పటికే 3 మృతదేహాలను వెలికితీసిన సహాయక బృందాలు గల్లంతైన మిగతావారిని గుర్తించేందుకు తీవ్రంగా శ్రమిస్తున్నారు. కొండచరియలు విరిగిపడి, సుమారు 130 ఇళ్లు పాక్షికంగా ధ్వంసమైనట్లు అధికారులు తెలిపారు. భారీ వర్షాలు కొనసాగుతుండటంతో కొండచరియలు విరిగిపడే అవకాశం ఉన్న ప్రాంతాల ప్రజలను సురక్షిత ప్రాంతాలకు తరలిస్తున్నారు.