Video: షాకింగ్‌.. ముంబయిలో కుప్పకూలిన నాలుగంతస్తుల భవనం

ముంబయి: మహారాష్ట్రలోని ముంబయి (Mumbai) నగరంలో షాకింగ్‌ ఘటన చోటుచేసుకుంది. పశ్చిమ బొరివలిలోని సాయిబాబా నగర్‌లో నాలుగంతస్తుల భవనం ఉన్నట్టుండి ఒక్కసారిగా కుప్పకూలిపోయింది. భవనం నేలకూలిపోతున్న సమయంలో శబ్దాలు రావడంతో స్థానికులంతా భయంతో పరుగులు పెట్టారు. అయితే, ఈ ఘటనలో ఇప్పటివరకు ఎవరికీ గాయాలు కాలేదని సమాచారం. ఇది శిథిలమైన భవనం కావడంతో ఇప్పటికే ఖాళీగానే ఉన్నట్టు అధికారులు వెల్లడించారు. శిథిలావస్థకు చేరిన భవనం అయినా అకస్మాత్తుగా కూలిపోవడం కలకలం రేపింది. ఈ ఘటనపై సమాచారం అందుకున్న అగ్నిమాపక సిబ్బంది అక్కడికి చేరుకొని సహాయక చర్యలు చేపట్టారు. ఈ భవనం శిథిలాల కింద ఎవరైనా చిక్కుకున్నారేమోనని పరిశీలిస్తున్నారు. సహాయక చర్యల కోసం ఘటనా స్థలంలో ఎనిమిది అగ్నిమాపక యంత్రాలు, రెండు రెస్క్యూ వ్యాన్‌లు, మూడు అంబులెన్స్‌లను మోహరించారు.