Terrorists: భోపాల్‌లో నలుగురు ఉగ్రవాదుల పట్టివేత

భోపాల్‌: మరో ఉగ్ర కుట్ర భగ్నమైంది. మధ్యప్రదేశ్‌ రాజధాని భోపాల్‌లోని రెండు ప్రాంతాల్లో నలుగురు ఉగ్రవాదులను పోలీసులు అరెస్టు చేశారు. ఆ రాష్ట్ర హోంమంత్రి నరోత్తమ్‌ మిశ్రా ఈ విషయాన్ని వెల్లడించారు. 2018లో జరిగిన బోద్‌ గయా బాంబు దాడులకు కారణమైన జమాత్‌-ఉల్‌-ముజాహిదీన్‌ బంగ్లాదేశ్‌ (జేఎంబీ) ఉగ్రవాద సంస్థకు చెందినవారుగా వీరిని గుర్తించినట్లు మంత్రి తెలిపారు.

అరెస్టు చేసినవారిని ఫజల్‌ అలీ (32), మహమ్మద్‌ ఇక్బాల్‌ (24), జహూరుద్దీన్‌ (28), అక్రమ్‌ అల్‌ హసన్‌గా గుర్తించినట్లు అధికారులు వెల్లడించారు. వారి గదుల్లో ల్యాప్‌ట్యాప్‌లు, పేలుడు పదార్థాలు, మత గ్రంథాలు లభించినట్లు పేర్కొన్నారు. యాంటీ టెర్రరిజం స్క్వాడ్, సెంట్రల్ ఇంటెలిజెన్స్ ఏజెన్సీలు సంయుక్తంగా ఈ ఆపరేషన్ చేపట్టాయి. ఉగ్రవాదులు తీసుకున్న ఓ గది స్థానిక పోలీస్‌స్టేషన్‌కు సమీపంలోనే ఉంటడం గమనార్హం. ప్రస్తుతం వారిని విచారిస్తున్నారు.