భారత్‌ దిగుమతుల్లో చైనాదే అగ్రస్థానం

దిల్లీ: సరిహద్దు ఘర్షణలతో భారత్‌, చైనా మధ్య ఉద్రిక్త వాతావరణం నెలకొన్నప్పటికీ దిగుమతుల్లో చైనాపైనే భారత్‌ ఎక్కువగా ఆధారపడుతోంది. భారత్‌ దిగుమతులు చేసుకునే దేశాల జాబితాలో 2020లో చైనా అగ్రస్థానంలో ఉంది. గతేడాది జనవరి నుంచి డిసెంబర్ మధ్య కాలంలో చైనా నుంచి దాదాపు 58.71 బిలియన్‌ డాలర్ల విలువైన దిగుమతులు జరిగాయి. తృణమూల్‌ కాంగ్రెస్‌ (టీఎంసీ) ఎంపీ మాలరాయి ప్రశ్నకు కేంద్ర వాణిజ్య శాఖ సహాయ మంత్రి హర్దీప్‌సింగ్‌ పూరి లోక్‌సభలో లిఖితపూర్వక సమాధానం ఇచ్చారు. ఈ జాబితాలో చైనా తర్వాత అమెరికా, యూఏఈ, సౌదీ అరేబియా, ఇరాక్‌ దేశాలు ఉన్నాయన్నారు. చైనా నుంచి ఎక్కువగా టెలికాం పరికరాలు, కంప్యూటర్‌ హార్డ్‌వేర్‌ పరికరాలు దిగుమతి అవుతున్నాయని వెల్లడించారు.