Gangasagar Pilgrims: బంగాళాఖాతంలో చిక్కుకుపోయిన 600 మంది ‘గంగా సాగర్‌’ యాత్రికులు

ఇంటర్నెట్‌డెస్క్‌: మకర సంక్రాంతి సందర్భంగా పశ్చిమబెంగాల్లో(West Bengal)ని 24 పరగణాల జిల్లా గంగాసాగర్‌(Gangasagar)లో పుణ్య స్నానాలకు వెళ్లిన సుమారు 600 మంది భక్తులు బంగాళాఖాతంలో చిక్కుకుపోయారు. దీంతో వెంటనే అధికారులు రంగంలోకి దిగి వారిని రక్షించేందుకు చర్యలు చేపట్టారు. ఇక్కడ హుగ్లి నది-బంగాళాఖాతంలో సంగమించే చోటుకు వీరు రెండు ఫెర్రీల్లో వెళ్లారు. కానీ, సముద్రంలో ఆటు రావడంతో నీరు తగ్గి ఆ రెండు ఫెర్రీలు బురదలో చిక్కుకుపోయాయి.

యాత్రికులు రాత్రి మొత్తం సముద్రంలోనే గడపాల్సి వచ్చింది. ఈ ఘటన కాక్‌ద్వీప్‌ వద్ద చోటు చేసుకొంది. దీంతో వీరిని రక్షంచడానికి కోస్టుగార్డ్‌ సిబ్బంది రంగంలోకి దిగారు. వీరికి సహాయ కోసం హోవర్‌ క్రాఫ్ట్‌ను కూడా పంపారు. నిన్న ఒక్క రోజే మకర సంక్రాంతి సందర్భంగా గంగాసాగర్‌లో దాదాపు 10 లక్షల మంది భక్తులు స్నానాలు చేశారు. దాదాపు 51 లక్షల మంది గంగాసాగర్‌ను సందర్శించి పూజలు చేశారు.