Karnataka: ఔరా.. 66 ఏళ్ల వయసులో అరేబియా సముద్రాన్ని ఈదేశాడు..!

ఉడిపి: విశ్రాంతి తీసుకునే వయసులో.. కర్ణాటకకు చెందిన ఓ వృద్ధుడు అసాధారణ ఘనత సాధించాడు. ఉడిపికి చెందిన 66 ఏళ్ల గంగాధర్‌ ఖేడ్కర్‌.. కాళ్లు, చేతులకు గొలుసులు కట్టుకొని అరేబియా సముద్రాన్ని నాలుగున్నర గంటల్లోనే ఈదేశారు. తద్వారా గోల్డెన్‌ బుక్ ఆఫ్‌ రికార్డ్స్‌లో స్థానం సంపాదించారు. సాధారణంగా విశ్రాంతి తీసుకునే వయసులో ఆయన ఈ రికార్డు సాధించడం చాలా గొప్ప విషయమంటూ గోల్డెన్‌ బుక్ ఆఫ్‌ రికార్డ్స్‌ ప్రతినిధి మనీశ్‌ విష్ణోయ్‌ కొనియాడారు. తన ప్రదర్శన పట్ల చాలా సంతోషంగా ఉన్నట్టు గంగాధర్‌ తెలిపారు. కాళ్లూ చేతులు కట్టేసుకొని.. డాల్ఫిన్ తరహాలో ఈదినట్టు చెప్పారు. చిన్నారులకు ఆదర్శంగా నిలిచేందుకు ఈ రికార్డు కోసం ప్రయత్నించినట్టు పేర్కొన్నారు. గతంలోనూ ఆయన పలు రికార్డులను నెలకొల్పారు.