దేశీయ విమాన సేవలు పెంచిన కేంద్రం

దిల్లీ: దేశీయ విమానయాన సేవలను 70 నుంచి 80 శాతం వరకు అందుబాటులోకి తీసుకొచ్చినట్లు కేంద్ర పౌర విమానయాన శాఖ మంత్రి హర్దీప్‌ సింగ్‌ పురి తెలిపారు. కొవిడ్‌-19 నేపథ్యంలో దేశీయ విమానాలను 70 శాతం వరకు నడుపుతున్నట్లు నవంబర్‌ 11న మంత్రి చెప్పారు. అయితే కరోనా కేసులు తగ్గుదల దృష్ట్యా విమాన సర్వీసుల సంఖ్యను ఎప్పటికప్పుడు పెంచుతూ వస్తున్నారు. ‘‘కరోనా ఉద్ధృతి నేపథ్యంలో మే 25న కేవలం 30 వేలతో మాత్రమే దేశీయ విమాన ప్రయాణాలు ప్రారంభమయ్యాయి. ప్రస్తుతం ఆ సంఖ్య 2.52 లక్షల వరకు చేరిందని’’ ట్విటర్‌లో పేర్కొన్నారు. మే 25 నుంచి 33 శాతం మాత్రమే దేశీయ సర్వీసులను నడపిన విమానయాన శాఖ రానురాను దేశీయ సర్వీసులను పెంచుకుంటూ వస్తోంది. జూన్‌  26న 45 శాతం, సెప్టెంబర్‌ 2న 60 శాతం వరకు పెంచింది.