SpiceJet: 737 మ్యాక్స్‌ విమానాలను ఆ పైలట్లు నడపకూడదు..

 90 మంది స్పైస్‌జెట్‌ పైలట్లపై డీజీసీఏ ఆంక్షలు..!

ఇంటర్నెట్‌డెస్క్‌: స్పైస్‌జెట్‌ విమానయాన సంస్థకు చెందిన 90 మంది పైలట్లు బోయింగ్‌ 737 మ్యాక్స్‌ విమానాలను నడపకూడదని  డీజీసీఏ ఆదేశించింది. వారికి ఈ విమానాలను నడపడంలో సరైన శిక్షణ లేనట్లు గుర్తించి ఈ నిర్ణయం తీసుకొంది. ‘‘ఇప్పటికైతే ఆ  పైలట్లు మ్యాక్స్‌ విమానాలు నడపకుండా ఆదేశాలు జారీచేశాం. వారు మరోసారి పూర్తిగా శిక్షణ పొందిన తర్వాత విమానాలను నడపవచ్చు. లోపాలకు కారణమైన వారిపై కఠిన చర్యలు తీసుకొంటాం’’ అని డీజీసీఏ చీఫ్‌ అరుణ్‌ కుమార్‌ ఒక ప్రకటనలో వెల్లడించారు. దీంతో ఈ పైలట్లు మ్యాక్స్‌ సిమ్యూలేటర్‌పై మరోసారి శిక్షణ తీసుకోవాల్సి ఉంది.

డీజీసీఏ నిర్ణయాన్ని స్పైస్‌జెట్‌ ప్రతినిధి కూడా ధ్రువీకరించారు. ‘‘స్పైస్‌ జెట్‌ వద్ద 737మ్యాక్స్‌ను నడిపేందుకు 650 మంది పైలట్లు శిక్షణ పొందారు. 90 మంది పైలట్ల శిక్షణ ప్రొఫైల్‌ను పరిశీలించిన డీజీసీఏ వారు మ్యాక్స్‌ విమానాలు నడపకుండా నిషేధం విధించింది. దీంతో ఈ పైలట్లు మరోసారి శిక్షణకు వెళ్లి డీజీసీఏ ప్రమాణాలను అందుకోవాల్సి ఉంది. ఈ పైలట్లు బోయింగ్‌ 737 విమానాలు నడిపేందుకు మాత్రం అందుబాటులో ఉంటారు’’ అని వెల్లడించారు. 

2019లో ఇథియోపియాలో 737మ్యాక్స్‌ విమానం ప్రమాదానికి గురికావడంతో అదే ఏడాది మార్చి 13న భారత్‌ ఈ విమానాలపై నిషేధం విధించింది. బోయింగ్‌ సంస్థ ఈ విమానాల్లో సాఫ్ట్‌వేర్‌ను అప్‌డేట్‌ చేయడంతో  గతేడాది ఆగస్టులో వీటిపై నిషేధాన్ని తొలగించారు. 27నెలల వ్యవధిలో పైలట్లు మ్యాక్స్‌ సిమ్యూలేటర్లపై పూర్తిస్థాయి శిక్షణ పొందాలని నిబంధన విధించారు.