ఫేస్‌బుక్‌ పదవికి అంఖి దాస్‌ రాజీనామా!

దిల్లీ: భారత ఫేస్‌బుక్‌ సంస్థలో కీలక పరిణామం చోటుచేసుకుంది. భారత, దక్షిణ మధ్య ఆసియా పబ్లిక్‌ పాలసీ డైరక్టర్‌ అంఖీదాస్‌ తన పదవికి రాజీనామా చేశారు. ఈ విషయాన్ని ఫేస్‌బుక్‌ సంస్థ మంగళవారం ఓ ప్రకటనలో వెల్లడించింది. ‘అంఖి దాస్‌ ప్రజా సేవపై ఉన్న ఆసక్తి మేరకే తన పదవి నుంచి వైదొలిగారు. అంతేకానీ ఎలాంటి వివాదాస్పద కారణాలు లేవు. ఫేస్‌బుక్‌ ఇండియాలో ఆమె 9 ఏళ్ల నుంచి ఉన్నారు. సంస్థ అభివృద్ధికి ఎంతో కీలక పాత్ర పోషించారు. కంపెనీకి గొప్ప సేవలు అందించారు. భవిష్యత్తులో ఆమె విజయాలు సాధించాలి’ అని సంస్థ పేర్కొంది.

కాగా ఓ జాతీయ పార్టీకి లబ్ది చేకూర్చే విధంగా వ్యవహరించినట్లు అంఖిదాస్‌పై ఆరోపణలు వచ్చిన కొద్ది నెలల్లోనే రాజీనామా చేయడం చర్చనీయాంశంగా మారింది. హిందూ జాతీయవాద వ్యక్తులకు సంబంధించిన విద్వేష ప్రసంగాలపై పరిమితుల విషయంలో అంఖిదాస్ ‌ చూసీచూడనట్లు వ్యవహరించారని ఆగస్టులో ఓ జర్నల్‌ ప్రచురించింది. ఈ వ్యవహారంలో ఆమెతో పాటు ఫేస్‌బుక్‌ సంస్థ సైతం విమర్శలు ఎదుర్కొన్న విషయం తెలిసిందే.