దిల్లీలో సామాజిక వ్యాప్తి దశలో కరోనా!

దిల్లీ: దేశ రాజధానిలో కరోనా వైరస్‌ సామాజిక వ్యాప్తి దశకు చేరుకుందని భావిస్తున్నట్లు దిల్లీ ఆరోగ్య శాఖ మంత్రి సత్యేంద్ర జైన్‌ అభిప్రాయపడ్డారు. అయితే దానిని కేవలం కేంద్ర ప్రభుత్వం లేదా భారత వైద్య పరిశోధన మండలి(ఐసీఎంఆర్‌ ) మాత్రమే నిర్ధరించగలవని అన్నారు.

ఆయన మీడియాతో మాట్లాడుతూ..‘దిల్లీ సహా దేశవ్యాప్తంగా ఇతర ప్రాంతాల్లో ప్రజలు ఎక్కువ సంఖ్యలో కరోనా వైరస్‌ బారిన పడుతున్నారంటే.. అక్కడ సామాజిక వ్యాప్తి జరుగుతోందని మనం అంగీకరించాలి. కానీ అది సాంకేతికతకు సంబంధించిన విషయం కాబట్టి.. కేంద్రం లేదా ఐసీఎంఆర్‌ మాత్రమే దానిని నిర్ధరించగలవు. గత 40 రోజుల్లో దిల్లీలో కేసులు రెండు రెట్లు పెరిగాయి’ అని తెలిపారు.

గత 24 గంటల్లో దిల్లీలో కరోనా వైరస్‌ కేసులు 4వేలకు పైగా నమోదు కావడంతో మొత్తం కేసుల సంఖ్య 2 లక్షల 38వేలకు చేరిన విషయం తెలిసిందే. ఇప్పటి వరకు దిల్లీలో మొత్తం వైరస్‌ బారిన పడి 4,907 మంది మృతి చెందారు. కాగా దేశవ్యాప్తంగా గడిచిన 24 గంటల్లో 93వేల కేసులు నమోదయ్యాయి. దీంతో దేశవ్యాప్త కేసుల సంఖ్య 53లక్షలకు చేరుకుంది.