ఐదో రోజూ 5 డిగ్రీల కన్నా తక్కువ ఉష్ణోగ్రత

దిల్లీ: దేశ రాజధానిలో వరుసగా  అయిదో రోజు కూడా ఉష్ణోగ్రత 5 డిగ్రీల కన్నా తక్కువగా నమోదైందని భారత వాతావరణ శాఖ తెలిపింది. దిల్లీలోని సఫ్దర్‌జంగ్‌లో శనివారం అత్యల్పంగా  4.4 డిగ్రీల ఉష్ణోగ్రత నమోదైంది. విపరీతమైన పొగ మంచు పెరిగిపోవడంతో సాధారణం కన్నా మూడు రెట్లు చలి పెరిగిందని వాతావరణశాఖ అధికారులు తెలిపారు.  దట్టమైన పొగమంచు ఆవరించడంతో సఫ్దర్‌జంగ్‌ ప్రాంతంలో 1000 మీటర్లు, పాలంలో 800 మీటర్ల దూరం నుంచి వచ్చే వాహనాలు కనిపించడంలేదని వాహనదారులు చెబుతున్నారు. 

  ఈ మేరకు ఐఎండీ ఛైర్మన్‌ కె. శ్రీవాస్తవ శనివారం వాతావరణ శాఖ వివరాలు వెల్లడించారు.  ఆదివారం, సోమవారం పశ్చిమం నుంచి వీచే గాలుల వల్ల పొగమంచు కాస్త  తగ్గే సూచనలు కనిపిస్తున్నాయని  ఆయన చెప్పారు.  ఈ సీజన్‌లో సాధారణంగా హిమాలయాల నుంచి వచ్చే మంచు ఎక్కువగా ఉంటుందన్నారు.  ప్రస్తుతం దిల్లీలో గాలి నాణ్యత తక్కువగా ఉంది.