విమాన ప్రమాదం: ఎటు చూసినా రోదనలే..! 

కొలికోడ్‌: కేరళలోని కొలికోడ్‌ విమానాశ్రయంలో ఘోర విమాన ప్రమాదం తీవ్ర విషాదాన్ని నింపింది. ఈ ఘటనలో పలువురు మృతిచెందగా..149మంది వేర్వేరు ఆస్పత్రుల్లో చికిత్సపొందుతున్నారు. ఇప్పటివరకు 23 మంది డిశ్చార్జి అయ్యారు. అయితే, నిన్న రాత్రి చోటుచేసుకున్న ఈ ఘటనలో గాయపడిన ఓ ప్రయాణికుడు తనకెదురైన భయానక అనుభవాన్ని గుర్తుచేసుకుంటూ.. ‘‘అదో పెద్ద విషాదం. మేమంతా పడిపోకుండా ఉండేందుకు మమ్మల్ని మేం బ్యాలెన్స్‌చేసుకొనే ప్రయత్నంలో ముందు సీట్లను పట్టుకున్నాం. కానీ విమానం ఒక్కసారిగా కూలి రెండు ముక్కలైపోయింది’’ అని తెలిపారు. 

‘‘ఆ సమయంలో చుట్టూ ఉన్నవారంతా రోదిస్తున్నారు. అప్పుడే ఎవరో చెప్పారు.. ఇద్దరు పైలట్లు, ఇద్దరు మహిళలు చనిపోయారని. ఈ రోజు దినపత్రికల్లో  17 నుంచి 18మంది చనిపోయినట్టు చదివాను. దీనికి బహుశా వాతావరణమే కారణం కావొచ్చు. పరిస్థితి అనుకూలించకపోతే విమానాన్ని మరో విమానాశ్రయంలో ల్యాండ్‌ చేసే ప్రయత్నం చేయాల్సింది.  కానీ ఇదంతా ఓ కలలా జరిగిపోయింది’’ అని తెలిపాడు. 

కరోనా మహమ్మారి కోరలు చాస్తోన్న నేపథ్యంలో విధించిన లాక్‌డౌన్‌తో విదేశాల్లో చిక్కుకున్న భారతీయులను తీసుకొచ్చేందుకు చేపట్టిన వందేభారత్‌ కార్యక్రమంలో భాగంగా ఈ విమానం సేవలందిస్తోంది. ఇందులో భాగంగా దాదాపు 190 మంది ప్రయాణికులు, సిబ్బందితో కొలికోడ్‌కు చేరుకున్న విమానం ఘోర ప్రమాదానికి గురైన విషయం తెలిసిందే.