రైతు మోర్చాకు అనుమతుల్లేవు..

న్యూదిల్లీ:  కేంద్రం కొత్తగా తీసుకొస్తున్న రైతు చట్టాలకు వ్యతిరేకంగా దేశ రాజధానిలో రైతు సంఘాలు నవంబర్‌ 26, 27న చేపట్టనున్న ‘రైతు మోర్చా’అభ్యర్థనను  బుధవారం పోలీసులు తిరస్కరించారు.  ‘రైతులు అనుమతి లేకుండా నగరంలోకి వచ్చి నిరసనలు చేపడితే చట్టపరమైన చర్యలు తీసుకుంటాం.  500 రైతు సంఘాలు నవంబర్‌ 26న నిర్వహించనున్న ‘ఛలో దిల్లీ’ర్యాలీకి అనుమతి ఇవ్వడం లేదు. కరోనా మహమ్మారి విజృంభిస్తున్న తరుణంలో పోలీసులకు సహకరించాలని కోరుతున్నాం.  నగరంలో ఎటువంటి సమావేశాలకు అనుమతులు లేవు.  నియమాలు ఉల్లంఘిస్తే చట్టపరమైన చర్యలు తీసుకుంటాం’అని దిల్లీ డిప్యూటీ పోలీస్‌ కమిషనర్‌ ట్వీట్‌ చేశారు. కేంద్ర ప్రభుత్వం కొత్తగా తీసుకొచ్చిన రైతు చట్టాలు రైతుల పంటకు కనీస మద్దతు ధరను నిర్వీర్యం చేస్తున్నాయని, దీనికి నిరసనగా  ఆల్‌ ఇండియా కిసాన్‌ సంఘర్ష్‌ కో ఆర్డినేషన్‌ కమిటీ(ఏఐకేఎస్‌సీసీ), రాష్ట్ర్రీయ కిసాన్‌ మహాసంఘ్‌, భారతీయ కిసాన్‌ యూనియన్‌లు కలిసి దేశ రాజధానిలో కిసాన్‌ మోర్చా ర్యాలీకి పిలుపునిచ్చాయి. ఈ ర్యాలీని విజయవంతం చేయాలని కోరుతూ రైతు సంఘాలు ఏడుగురు సభ్యుల బృందాన్ని ఏర్పాటు చేశాయి.