ప్రభుత్వ విద్యాసంస్థల్లో ఇంటర్నెట్‌ ఉచితం 

దేశంలోనే తొలిసారిగా ప్రవేశపెట్టిన రాష్ట్రం

హరిద్వార్‌: దేశంలోనే తొలిసారిగా ఉత్తరాఖండ్‌ రాష్ట్రంలోని అన్ని ప్రభుత్వ కళాశాలలు, విశ్వ విద్యాలయాల్లో విద్యార్థులకు ఉచిత వైఫై సదుపాయం అందుబాటులోకి వచ్చింది. ఈ పథకాన్ని ఆ రాష్ట్ర ముఖ్యమంత్రి త్రివేంద్రసింగ్‌ రావత్‌ దోయివాలా పట్టణంలోని షహీద్‌ దుర్గామల్‌ ప్రభుత్వ పీజీ కళాశాలలో ప్రారంభించారు. ప్రధాన మంత్రి నరేంద్ర మోదీ కలలుగన్న డిజిటల్‌ ఇండియా సాధన దిశగా ఈ చర్యను ఆయన అభివర్ణించారు.

అన్ని ప్రభుత్వ కళాశాలలు, విశ్వవిద్యాలయాలకు అత్యంత వేగవంతమైన, ఉచిత వైఫై సేవలను అందుబాటులోకి తెచ్చిన తొలి రాష్ట్రంగా ఉత్తరాఖండ్‌ నిలిచినందుకు ఆయన అభినందనలు తెలిపారు. కాగా, ఈ ఉచిత ఇంటర్నెట్‌ సదుపాయం రాష్ట్ర విద్యావిధానంలో మంచి ఒరవడికి నాంది కాగలదని ముఖ్యమంత్రి ఆశాభావం వ్యక్తం చేశారు.