క్షమించండి.. నేనప్పుడు ‘అలా’ లేను!

రిషీకేశ్‌ ఉదంతంపై ఫ్రెంచి మహిళ స్పందన

రిషీకేశ్‌: ఉత్తరాఖండ్‌లోని ప్రముఖ హిందువుల పుణ్యక్షేత్రం రిషీకేశ్‌లో అభ్యంతరకరంగా ప్రవర్తించారనే ఆరోపణలపై ఫ్రెంచి మహిళ మేరీ హెలెన్‌ గురువారం అరెస్టయిన సంగతి తెలిసిందే. ఈ నేపథ్యంలో.. భారతీయుల మనోభావాలను గాయపరిచి ఉంటే క్షమించాలని ఆమె కోరారు.. అయితే ఆ సమయంలో తాను నగ్నంగా లేనని స్పష్టం చేశారు. మహిళలపై జరుగుతున్న అత్యాచారాలను గురించి సమాజంలో అవగాహన తీసుకొచ్చే ఉద్దేశంతో తాను ఈ విధంగా చేశానని హెలెన్‌ వివరించారు.

ఇక్కడ గంగానదిపై ఉన్న సుమారు వంద సంవత్సరాల నాటి వంతెన లక్ష్మణ్‌ ఝూలాపై నగ్నంగా వీడియోలు తీసి, వాటిని సామాజిక మాధ్యమాల్లో ఉంచినందుకు.. ఇంటర్నెట్‌ చట్టాల ప్రకారం 27 ఏళ్ల ఈ యువతిని పోలీసులు గురువారం అరెస్టు చేశారు. అయితే తాను ఈ వీడియో తీస్తుండగా చుట్టుపక్కల ఎవరూ లేరని..  దేశంలో లైంగిక దాడులను గురించి అవగాహన తీసుకొచ్చేందుకు మాత్రమే ఈ విధంగా చేశానని మేరీ హెలెన్‌ అంటున్నారు. కాగా, తను పూసలతో చేసిన గొలుసులు అమ్ముతానని, తన వ్యాపారానికి ప్రచారం కోసమే ఈ విధంగా చేశానని ఆ ఫ్రెంచి మహిళ తొలుత అంగీకరించినట్టు పోలీసులు చెబుతున్నారు. విచారణ కోసం ఫ్రెంచి యువతి మొబైల్‌ను స్వాధీనం చేసుకుని... అనంతరం ఆమెను బెయిల్‌పై విడుదల చేసినట్టు వారు వివరించారు.