వాతావరణ మార్పులతో చదువుకు దూరం

ముంబయి: వాతావరణ మార్పులు చిన్నారులపై తీవ్ర ప్రభావాన్ని చూపుతున్నాయని, దాని పరిష్కారానికి అత్యవసర వ్యూహాన్ని అమలు చేయాల్సిన అవసరం ఉందని పీడబ్ల్యూసీ నివేదిక వెల్లడిచేసింది. ‘ప్రొటెక్ట్‌ ఏ జనరేషన్: క్లైమేట్ సెక్యూరిటీ ఫర్ ఇండియాస్‌ చిల్డ్రన్’ శీర్షికన ఈ నివేదికను విడుదల చేసింది. సేవ్‌ ది చిల్డ్రన్ సీఈఓ బిడిశా పిళ్లై, పీడబ్ల్యూసీ గ్లోబల్ ఆఫీస్ ఫర్ హ్యుమానిటేరియన్ అఫైర్స్ వైస్ ఛైర్మన్ జైవీర్ సింగ్ సంయుక్తంగా ఈ నివేదికను సిద్ధం చేశారు.  

‘వ్యవసాయం, తీరప్రాంత జీవనోపాధిపై ఆధారపడిన జనాభా(పిల్లలతో సహా)కు వాతావరణ మార్పుల కారణంగా అసమాన ప్రమాదం పొంచి ఉంది’ అని ఆ నివేదిక ఆందోళన వ్యక్తం చేసింది. అలాగే చిన్నారులు ఈ మార్పుల భారం భరిస్తారని, ఇది వారి మనుగడ, భద్రత, అభివృద్ధి వంటి వారి ప్రాథమిక హక్కును దెబ్బతీస్తుందని హెచ్చరించింది. కాగా, వాతావరణ మార్పుల ప్రభావాలను అనుభవిస్తోన్న ప్రాంతాల గురించి సోదాహరణంగా వివరించింది.

* వ్యవసాయ ఉత్పాదకత క్షీణించడంతో దానిపై ఆధారపడిన పశ్చిమ బెంగాల్‌లోని మోరేనా, పురూలియా ప్రాంతాల్లోని కుటుంబాలు అప్పుల్లో కూరుకుపోయాయని, ఆ కారణంగా ఆ ఇళ్లలోని చిన్నారులు చదువును మానేయాల్సిన పరిస్థితి తలెత్తింది.

*మధ్యప్రదేశ్‌లోని ఖార్గావ్ ప్రాంతంలో భూగర్భ జలాలు అడుగంటి పోవడంతో తాగునీరు లభ్యత లేకపోవడంతో.. అది పిల్లల్లో డీహైడ్రేషన్‌కు దారితీసింది.

కాగా, పిల్లల భద్రతను నిర్ధారించడానికి వాతావరణ మార్పులకు సంబంధించిన సమస్యలను పరిష్కరించడానికి అమలు చేయాల్సిన భవిష్యత్తు వ్యూహాలపై ఈ నివేదిక  సూచనలు చేసింది. చిన్నారులపై చూపే ప్రభావాలను పరిష్కరించడానికి భారత్‌ సరైన విధాన నిర్ణయాలు తీసుకోవాల్సిన అవసరం ఉందని నొక్కి చెప్పింది.